Auðvelt hjá Anderson, endurkoma hjá Bunting og Gurney sigraði þrátt fyrir svefnleysi

Anderson, heimsmeistarinn frá 2015 og 2016, vann öruggan sigur á Devon Petersen, 4-0.

Andersen lenti í miklum vandræðum með hinn svifaseina Mensur Suljovic í 32-manna úrslitunum en Petersen var ekki mikil fyrirstaða fyrir Skotann. Andersen átti meðal annars þessa frábæru 160 úttekt í öðru settinu.

Petersen fékk tækifæri til að vinna þriðja settið en tókst ekki og Anderson vann svo fjórða settið örugglega, 3-0.

Öllu meiri spenna var í viðureign Buntings og Ryans Searle. Bunting byrjaði betur, vann fyrstu tvö settin en Searle svaraði með því að vinna næstu tvö sett. Þeir skiptu næstu tveimur settum á milli sín og því þurfti sjöunda settið til að knýja fram sigurvegara.

Searle vann fyrstu tvo leggina í sjöunda settinu en nýtti ekki tækifærin sem gáfust til að klára leikinn. Bunting nýtti sér það, jafnaði í 2-2 og kláraði svo oddalegginn með aðeins þrettán pílum.

Í fyrsta leik dagsins bar Gurney sigurorð af Vincent van der Voort, 4-2. Hann var nálægt því að ná níu pílna leik í þriðja settinu en kvaðst annars ósáttur með sína spilamennsku.

„Mér fannst ég vera hræðilegur. Ég var mjög heppinn í fyrsta settinu,“ sagði Gurney eftir leikinn. „Ég þarf að spila betur. Ég kom sjálfum mér í erfiðar stöður. Ég svaf kannski tvo klukkutíma í nótt. Hugarfarið breytist núna. Ég verð mun ferskari eftir einn frídag.“

Sextán manna úrslitunum lýkur í kvöld með þremur leikjum. Dirk van Duijvenbode mætir Glen Durrant, Gerwyn Price og Mervyn King eigast við og Dave Chisnall og Dimitri Van Der Bergh kljást.

Bein útsending frá seinni hluta HM í dag hefst klukkan 18:00 á Stöð 2 Sport 3.

HM í pílukasti er á Stöð 2 Sport en upplýsingar um útsendingar má finna hér. HM í pílukasti er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.