Undrast veggjöld á stofnæðum höfuðborgarsvæðisins

Framkvæmdastjóri Félags íslenskra bifreiðaeigenda segist ekki trúa því að óreyndu að samgönguráðherra og sveitarfélögin á höfuðborgarsvæðinu ætli sér að taka upp veggjöld á helstu stofnæðum höfuðborgarsvæðisins til þess að fjármagna samgönguframkvæmdir. Hann segir að verði hugmyndirnar að veruleika geti íbúar á ákveðnum svæðum búist við aukakostnaði á bilinu 30-40 þúsund krónum á mánuði.

Greint var frá því í kvöldfréttum Ríkisútvarpsins í gær að Sigurður Ingi Jóhannsson, samgöngu- og sveitarstjórnarráðherra ásamt fulltrúa Samtaka sveitarfélaga á höfuðborgarsvæðinu, hafi kynnt framtíðarsýn ríkis og sveitarfélaga um samgöngur á höfuðborgarsvæðinu en fundinn sátu kjörnir fulltrúar sveitarfélaganna.

Í fréttinni kemur fram að efni fundarins hafi ekki verið gert opinbert en að samkvæmt heimildum verði um 125 milljarðar króna settir í hinar ýmsu framkvæmdir fram til ársins 2033. Til að fjármagna samgönguframkvæmdir í og við höfuðborgarsvæðið, þar með talið borgarlínu, eru hugmyndir um að taka upp veggjöld á helstu stofnæðum höfuðborgarsvæðisins. Eru hugmyndir um að gjöldin verði á bilinu tvö til sex hundruð krónur fyrir hverja ferð, þau verði hæst á háannatíma en lægri á öðrum tímum sólarhrings.

Ekki náðist í samgönguráðherra við vinnslu fréttarinnar og sagði aðstoðarmaður hans að málið yrði kynnt síðar. Runólfur Ólafsson, framkvæmdastjóri Félags íslenskra bifreiðaeigenda segist undrandi á þessum hugmyndum.

„Ég trúi því ekki að óreyndu að þetta séu einhverjar raunverulegar hugmyndir. Ef þetta væri að ganga fram þá mættu íbúar á ákvðenum svæðum á höfuðborgarsvæðinu búast við að fá á sig viðbótarálögur sem væru kannski einhvers staðar á bilinu 30 til 40 þúsund krónur á mánuði. Ef við hugsum þetta í einu ári þá erum við komin í 4-500 þúsund og til að afla þeirra tekna þarf fólk að hafa yfir 700 þúsund í tekjur. Láglaunafólk væri þá tvo mánuði aukalega að vinna sér bara fyrir þessum nýju veggjöldum, fyrir utan annan kostnað við rekstur bílsins. Þannig að ég held að þetta sé mjög vanhugsað ef þetta er raunverulegt.“

Runólfur segir að nú þegar sé verið að rukka gríðarlegar fjárhæðir í formi skatta af bíleigendum og að aðeins hluti þess sé að skila sér í samgöngur og samgöngubætur

„Fjölskyldurnar í landinu eru að borga þegar hátt í 80 milljarða króna í formi skatta af notkun einkabílsins. Þannig að aðeins hluti af því hefur runnið til samgangna og samgöngubóta og vegaframkvæmda. Það var val sveitarfélaga á höfuðborgarsvæðinu að draga úr samgönguframkvæmdum á höfuðborgarsvæðinu og aukinn á móti styrkur til Strætó og almenningssamgangna. Því miður hefur það ekki skilað þeim árangri að halda í við þá umferðaraukningu sem hefur átt sér stað. Hluti af þeirri umferðaraukningu tengist meðal annars stóraukinni ferðaþjónustu,“ segir Runólfur.

„Það er svolítið furðulegt að ætla svo að setja stórauknar álögur á afmarkaðan hóp landsmanna á höfuðborgarsvæðinu til þess að koma hlutum í það horf sem eðlilegt væri, og hefði átt fyrir löngu að gera ráðstafanir með.“