Kláraði leikinn með skaddað nýra - og vann

Andrew Luck, leikstjórnandi Indianapolis Colts, verður ekki með liði sínu næstu 2-6 vikurnar þar sem að hann hlaut meiðsli á nýra í leik með liði sínu gegn Denver Broncos um helgina.

Luck, sem er talinn einn besti ungi leikstjórnandi deildarinnar, meiddist í upphafi fjórða leikhluta en náði engu að síður að klára leikinn og tryggja sínum mönnum að lokum sigur. Myndband af atvikinu þar sem talist er að Luck hafi hlotið meiðslin má sjá hér.

Sjá einnig: Peyton kvaddi gamla heimavöllinn með tapi

Tímabilið hefur þó verið erfitt fyrir Luck og Colts sem margir spáðu mikilli velgengni í vetur. Liðið hefur aðeins unnið fjóra leiki af níu en er þrátt fyrir það enn með forystu í suðurriðli Ameríkudeildarinnar. Colts á því enn möguleika á að komast í úrslitakeppnina.

Chuck Pagano, þjálfari Colts, sagði í dag að það væri enn óvíst hversu lengi Luck yrði nákvæmlega á hliðarlínunni. Hann sagði að staða hans yrði metin jafnóðum.

Sjá einnig: Augnapot kostaði 42 milljónir

Hinn fertugi Matt Hasselback mun nú taka yfir sóknarleik Colts í næstu leikjum en hann sýndi nú fyrr í haust að hann er enn fullfær um að spila í NFL-deildinni. Colts vann tvo leiki með Hasselback inn á þegar Luck var frá vegna meiðsla.

Leikurinn á sunnudag var sá langbesti hjá Luck í ár en hann þarf nú að vona að liðið eigi enn möguleika á að bjarga tímabilinu þegar og ef hann snýr aftur í desember.