Steelers ákvað að semja við Vick

Michael Vick, sem var dæmdur fyrir hundaníð á sínum tíma, er kominn með nýja vinnu í NFL-deildinni.

Pittsburgh Steelers er búið að gera eins árs samning við leikstjórnandann sem orðinn er 35 ára.

Honum er ætlað að vera til taks ef eitthvað kemur fyrir leikstjórnanda Steelers, Ben Roethlisberger.

Það eru sex ár síðan Steelers sýndi honum fyrst áhuga en betra seint en aldrei. Mike Tomlin, þjálfari liðsins, segist vera himinlifandi með að fá Vick í liðið.

Vick spilaði með NY Jets á síðustu leiktíð og kom þá við sögu í tíu leikjum liðsins.