Loksins vann Dallas í úrslitakeppninni

Fyrsta umferðin í úrslitakeppni NFL-deildarinnar, Wild Card-helgin, fór fram um helgina.

Eftir fimm ára bið án sigurs í úrslitakeppninni kom að því að Dallas Cowboys gat loksins fagnað. Það stóð þó afar tæpt.

Liðið lenti tíu stigum undir í leiknum en kom til baka og Tony Romo, leikstjórnandi Dallas, kastaði snertimarkssendingu á Terrance Williams undir lokin sem kláraði leikinn.

Sigursóknin kom eftir afar umdeildan dóm í leiknum þar sem dómarar leiksins hættu við að dæma á Dallas og liðið fékk svo fljótlega boltann. Verður líklega lengi rifist um það atvik.

Úrslit helgarinnar:

Dallas-Detroit  24-20

Indianapolis-Cincinnati 26-10

Baltimore-Pittsburgh  30-17

Carolina-Arizona  27-16

Næsta umferð lítur svona út:

Ameríkudeildin:

New England - Baltimore

Denver - Indianapolis

Þjóðardeildin:

Seattle - Carolina

Green Bay - Dallas

Undanúrslit deildarinnar og úrslitaleikurinn, Super Bowl, verða í beinni útsendingu á Stöð 2 Sport.