Eineltisfórnarlambið fór til San Francisco

Jonathan Martin varð einn umtalaðasti íþróttamaður Bandaríkjanna er hann sakaði liðsfélaga sína hjá Miami Dolphins um einelti. Hann hætti að spila með liðinu í kjölfarið.

Málið hefur fengið gríðarlega fjölmiðlaathygli í Bandaríkjunum og NFL stóð fyrir óháðri rannsókn á málinu sem kostaði mikinn tíma og peninga.

Í gær fann Martin sér svo nýtt heimili er hann samdi við San Francisco 49ers. Þar hittir hann fyrir gamla þjálfarann sinn úr háskóla, Jim Harbaugh. Sá stóð við bakið á honum í eineltismálinu.

Hann var ekki eini leikmaðurinn sem San Francisco fékk í gær en félagið samdi þá einnig við leikstjórnandann, Blaine Gabbert, en hann kom frá Jacksonville.

Leikmannamarkaðurinn í NFL er kominn í fullan gang og margir leikmenn munu skipta um lið næstu daga.

Stærstu tíðindin til þessa er að Denver samdi við besta bakvörð New England, Aqib Talib. Svo er DeMarcus Ware á leiðinni frá Dallas og annar öflugur varnarmaður, Julius Peppers, verður ekki áfram hjá Chicago.