Reknir fyrir að taka myndir af sér með Tom Brady

Stórstjarnan Tom Brady, leikstjórnandi New England Patriots í NFL-deildinni, skildi eftir sig sviðna jörð í Houston um síðustu helgi.

Hann byrjaði á því að tryggja sínum mönnum dramatískan 34-31 sigur á Houston. Ekki nóg með það því tveir öryggisverðir Reliant-vallarins voru síðan reknir fyrir að taka myndir, svokallaðar Bolamyndir, af sér með Brady.

"Þeir gáfu mér enga raunverulega ástæða fyrir brottrekstrinum. Sögðu að ég ætti að vita af því að ég hefði gert eitthvað sem væri ekki í lagi og því væri ég rekinn," sagði annar mannanna sem missti starfið.

Mennirnir báðir eru afar svekktir með þessi málalok og spurning hvort það verði frekari eftirmálar.