Eitt barn smitaðist af alnæmi

Yngsti Íslendingurinn sem hefur greinst með alnæmi var innan við fimm ára gamall og smitaðist frá móður. Þetta kemur fram í svari heilbrigðisráðherra við fyrirspurn Guðrúnar Ögmundsdóttar þingmanns um alnæmissmit.

183 hafa greinst með alnæmi frá árinu 1983, 141 karlmaður og 42 konur. Helmingur smitaðist við kynmök samkynhneigðra, 34 prósent við kynmök gagnkynhneigðra og ellefu prósent við fíkniefnaneyslu um æð. Fjórir smituðust við blóðgjöf fyrir árið 1985 og eitt barn smitaðist frá móður sinni en ekki er vitað um smitleið í þremur tilvikum.