Hraðlest úr Perlu til Keflavíkur

Sælir. Ég hef mikið hugsað útí þennan flugvöll sem er þarna í Vatnsmýrinni. Sumir vilja hann burt og aðrir ekki. Mér finnst eins og fólk hugsi of mikið um þær lausnir sem til eru í dag í staðinn fyrir að skipuleggja framtíðina með framtíðarlausnir fyrir augum. Ég vil að flugvöllurinn fari, og þá segja menn að það taki of langan tíma fyrir Reykvíkinga að fljúga út á land. Reykvíkingar eru bara hluti af umferð um völlinn. Það er til fólk sem vill komast utanað landi í flug til Keflavíkur og áfram til útlanda o.s.frv. Ef hægt væri að selja allt land sem er undir flugvellinum núna á metverði fyrir ýmsa starfsemi og þétta íbúabyggð og einnig spara rekstur flugvallarins þá skapast miklir peningar. Við gætum þá sett á laggirnar lest sem knúin er af rafmagni eða vetni og það hefur lengi verið til tækni þar sem lestar fara á yfir 200km hraða. Þessi lest kæmist á innan við 15 mínútum frá Reykjavík og beint upp á Keflavíkurflugvöll. Hafa þyrfti 3 stk. lestar í umferð þannig að alltaf væri ein tilbúin að fara frá einum stað til annars. Ein alsherjar umferðarmiðstöð yrði reist við Perluna og yrði hún mjög stór en samt hagkvæm. Undir þaki yrðu bílastæði á mörgum hæðum við stöðina. Þarna yrðu undir einu þaki rútumiðstöð, strætómiðstöð, leigubílar, ferðaskrifstofuútibú, verslanir og lestin. Þarna myndu Reykvíkingar og aðrir koma þegar þeir ætla að fljúga innanlands eða utanlands og leggja bílunum sínum í bílastæðishús og ganga þaðan inn í umferðarmiðstöðina og skrá sig í flug. Þegar ég tala um að skrá sig í flug þá meina ég að þeir ganga að afgreiðsluborði eins og þeir væru staddir í Flugstöð Leifs Eiríkssonar og skrái sig í flug og fái afhendan flugseðil, afhenda farangur og fara í gegnum skoðun. Þá geta þeir gengið beint að lestinni sem fer á 15 min. fresti og sest inn og beðið spenntir eftir skemmtilegri lestarferð. Allur farangur og frakt fer inn í tölvuskráningarkerfi og er settur í sérstaka kassa sem fljótt er settur um borð í fraktvagna lestarinnar. Kassarnir eru síðan teknir á nokkrum sekúndum úr lestinni í Flugstöð Leifs Eiríkssonar. Þarna sleppa Reykvíkingar við að keyra Reykjanesbrautina þegar þeir fara í flug til útlanda og geta í raun tekið taxa niður í Umferðarmiðstöðina og verið komnir út á völl á mettíma. Þannig að þegar fólk síðan kemur með lestinni að Flugstöð Leifs Eiríkssonar þá stoppar lestin við flugstöðina þannig að farþegar í utanlandsflug ganga beint inn í biðsal fyrir útlandsfarþega og farþegar fyrir innanlandsflug ganga beint inn í biðsal fyrir innanlandsfarþega. Þegar hinsvegar útlendingar ( og Íslendingar) koma til Íslands þá fara þeir um borð í lestina og ferðast til Reykjavíkur og þegar þeir koma að Öskjuhlíðinni þá fara þeir inn í göng og koma út norðaustan við Perluna og fara öfugan hring um Perluna og þá opnast þeim stórkostleg sýn þar sem þeir horfa yfir nýja hverfið í Vatnsmýrinni og miðborgina og svo fer lestin inn í Umferðarmiðstöðina þar sem fólkið nær í farangurinn og fer í gegnum tollskoðun og svo út og velur þar nákvæmlega þann ferðamáta sem það vill. Fólk sem býr úti á landi flýgur auðvitað beint til Keflavíkur og svo beint áfram til útlanda. Sala á Vatnsmýrinni, sparnaður á rekstri Reykjavíkurflugvallar og lest sem yrði knúin áfram af íslensku afli ásamt því að umferð á Reykjanesbraut myndi minnka og slysum fækka gerir þetta verkefni þjóðhagslega hagkvæmt. Tíminn sem fer í ferðir Reykvíkinga með flugi út á land myndi ekki aukast. Komandi tölvutækni og ýmis önnur tækni gerir þetta kleift. Allir græða. Gaman væri ef þið mynduð skoða þennan möguleika af allvöru og fá botn í það hvort þetta eru draumar, eða draumar sem geta orðið að veruleika. Og það er ekki sama við hvern er talað í svona máli.   Með bestu kveðju, Vilmundur Sigurðsson.