Jón Birgir ráðinn for­stjóri Kviku

Þetta kemur fram í tilkynningu frá Kviku banka en þar segir að Jón búi yfir mikilli reynslu af alþjóðlegum fjármálamörkuðum og hafi stærstan hluta starfsferils síns starfað erlendis hjá tveimur af stærstu eignastýringarfyrirtækjum heims.

Jón hafi lokið grunnnámi í stærðfræði við Háskóla Íslands og framhaldsnámi í fjármálaverkfræði við New York University.

„Á árunum 2013 til 2025 starfaði Jón Birgir hjá Neuberger Berman í London, þar sem hann var einn af eigendum félagsins og gegndi stjórnendastöðu. Hann kom til félagsins til að styrkja starfsemi þess á sviði alþjóðlegra skuldabréfafjárfestinga og sinnti síðar í auknum mæli samskiptum við fag- og stofnanafjárfesta.“

Þar áður hafi hann starfað hjá J.P. Morgan Asset Management frá árinu 1998, bæði í New York og London, sem sjóðstjóri með áherslu á skuldabréf og alþjóðlega vaxtamarkaði.

Þrátt fyrir að hafa starfað lengi erlendis hafi Jón haldið sterkum tengslum við íslenskt atvinnulíf, meðal annars sem stjórnarformaður í Bresk-íslenska viðskiptaráðinu.

Umfangsmikil reynsla og alþjóðleg tengsl muni nýtast vel

„Ég er fyrst og fremst stoltur og þakklátur fyrir það traust sem mér er sýnt. Þetta er virkilega spennandi verkefni og bankinn er einstaklega vel í stakk búinn til áframhaldandi sóknar, með góða innviði, sterkan efnahagsreikning og framúrskarandi starfsfólk. Markmið okkar er og verður áfram að veita viðskiptavinum okkar öfluga fjármálaþjónustu,“ er haft eftir Jóni í tilkynningunni.

Eins og fyrr sagði tekur Jón Birgir við starfinu af Ármanni Þorvaldssyni, en hann tilkynnti í júní að hann hygðist láta af störfum sem forstjóri bankans.

Ármann tók við sem forstjóri Kviku árið 2017, var um tíma aðstoðarforstjóri félagsins og hefur síðan aftur gegnt stöðu forstjóra síðastliðin þrjú ár.

Haft er eftir Sigurði Hannessyni stjórnarformanni Kviku að Ármann eigi miklar þakkir skildar fyrir hans mikilvæga framlag til bankans.

„Það er ánægjulegt að fá Jón Birgi í öflugt lið Kviku. Umfangsmikil reynsla hans af fjármálamörkuðum og sterk alþjóðleg tengsl munu nýtast Kviku vel í áframhaldandi þróun bankans.

Um leið vil ég þakka Ármanni Þorvaldssyni fyrir mikilvægt framlag hans til Kviku. Á forstjóratíð hans hefur bankinn vaxið verulega og þróað öflugan og fjölbreyttan rekstur. Fyrir þann árangur á Ármann, ásamt öllu því öfluga starfsfólki sem lagt hefur sitt af mörkum á þessari vegferð, miklar þakkir skildar,“ er haft eftir Sigurði.