Fram á toppinn og flautumark á Sel­fossi

Fram sótti Stjörnuna heim í Mýrina í Garðabæ í kvöld og leikur liðanna varð aldrei spennandi. Fram var komið með sex marka forystu, 10-4, um miðjan fyrri hálfleik og staðan í hálfleik 17-10 fyrir gestina úr Úlfarsárdal.

Sá sjö marka munur hélst allt til loka og 35-28 sigur Fram niðurstaðan.

Lena Margrét Valdimarsdóttir og Katrín Anna Ásmundsdóttir skoruðu báðar sjö mörk fyrir Fram í kvöld og Harpa María Friðgeirsdóttir sex. Inga María Reynisdóttir í liði Stjörnunnar var markahæst á vellinum með níu mörk.

Fram er með fjögur stig eftir fyrstu tvo leikina á toppi deildarinnar en Stjarnan er stigalaus.

Dramatík á Selfossi

Grótta var í leit að fyrstu stigum sínum er liðið heimsótti Selfoss. Þar voru heimakonur með yfirhöndina í byrjun jafns fyrri hálfleiks en Grótta sterkari á síðari hluta hálfleiksins. Staðan 15-12 fyrir Gróttu í hléi.

Grótta náði sex marka forskoti snemma í síðari hálfleiknum en Selfosskonur gáfust ekki upp. Við tók langur rúmlega tuttugu mínútna eltingaleikur og þegar 90 sekúndur voru eftir tókst Selfyssingum að jafna 23-23.

Liðin skiptust á mörkum á hröðum lokakafla og staðan 25-25 þegar Grótta geystist upp í lokasókn þar sem Katrín Scheving Thorsteinsson skoraði flautumark á lokasekúndu leiksins.

Dramatískur 26-25 sigur Gróttu reyndin og liði komið á blað. Bæði lið eru með tvö stig eftir fyrstu tvo leikina.

Gróttukonan Karlotta Kjerúlf Óskarsdóttir stóð upp úr á vellinum í dag og skoraði tíu mörk en áðurnefnd Katrín Scheving skoraði átta.

Hjá Selfossi skoraði Hulda Dís Þrastardóttir sex en Harpa Valey Gylfadóttir og Perla Ruth Albertsdóttir fimm hvor.

Upplýsingar fengnar af HBStatz.is.