SÁÁ missir for­stjóra og yfir­lækni

Stjórn SÁÁ gerði starfslokasamning við Ragnheiði Huldu Friðriksdóttur, forstjóra SÁÁ, í síðasta mánuði. Þóra Björk Ingólfsdóttir, fagstjóri á meðferðarstöðinni Vík, fylgdi í kjölfarið.

Valgerður Rúnarsdóttir, framkvæmdastjóri lækninga, tilkynnti svo starfsfólki SÁÁ í morgun að hún ætlaði einnig að láta af störfum. Í samtali við Vísi sagðist Valgerður á leið í leyfi og að framtíðin ætti eftir að ráðast. Vísaði hún að öðru leyti á formann SÁÁ.

Anna Hildur Guðmundsdóttir, formaður SÁÁ, hafði ekki fengið fregnir af því að Valgerður hefði sagt upp störfum í morgun. Hún lagði áherslu á að sem formaður stjórnar kæmi hún ekki nærri starfsmannamálum samtakanna.

Ásgerður Th. Björnsdóttir er settur forstjóri SÁÁ eftir brotthvarf Ragnheiðar Huldu. Hún er framkvæmdastjóri rekstrarsviðs samtakanna. Ekki náðist samband við hana strax við vinnslu fréttarinnar.

Brotthvarf stjórnendanna þriggja tengist ágreiningi á milli stjórnar SÁÁ annars vegar og fagstarfsmanna um meðferðarstarfið og forgangsröðun í því samkvæmt heimildum Vísis.

Árið 2022 lýstu starfsmenn SÁÁ yfir vantrausti á þáverandi formann og framkvæmdastjórn eftir að hún sagði öllum sálfræðingum samtakanna upp störfum.

Fréttin var uppfærð eftir að náðist í Valgerði Rúnarsdóttur.