Með nefið í flug­brautinni eftir harka­lega lendingu

Að sögn Guðjóns Helgasonar upplýsingafulltrúa Isavia barst tilkynning frá áhöfn flugvélarinnar klukkan 17:48. Hún var að koma inn til lendingar og lét áhöfnin vita að hún hefði orðið vör við að mögulega væri bilun í lendingarbúnaði.

Ekki liggur fyrir hvað það var sem fór úrskeiðis eða í hverju bilunin fólst en lendingin gekk ekki að óskum og vélin hafnaði með nefið í flugbrautinni á brautamótunum.

Þar verður hún kyrr þar til Rannsóknarnefnd samgönguslysa hefur lokið vettvangsskoðun.

Á meðan er flugvöllurinn lokaður. Guðjón segir að brottfarir síðdegis og í kvöld gætu mögulega tafist og hvetur þá sem eiga miða til að fylgjast vel með stöðu mála.