Thule lækkar í prósentu

Nýr Thule verður fáanlegur á næstu dögum og vikum á börum, veitingastöðum, í netverslunum og í Vínbúðinni, að sögn félagsins.

Frá þessu er greint í tilkynningu frá Coca Cola á Íslandi, sem bruggar bjórinn, en þar er þessi nýja „staðfærsla“ sögð byggja á skilaboðunum: „Thule er alltaf léttur. Alltaf Lite.“

Þetta þýðir að fimm prósenta Thule-bjórinn, sem bruggaður hefur verið á Akureyri í sextíu ár, verður ekki lengur framleiddur sem slíkur, heldur verður aðeins hægt að fá hann sem léttan bjór en hann mun þó áfram heita Thule.

„Við vildum gera Thule meira Thule,“ er haft eftir Atla Sigurði Kristjánssyni, framkvæmdastjóra markaðssviðs Coca-Cola á Íslandi, í fréttatilkynningu.

„Nú erum við að skerpa á því og færa vöruna nær því sem neytendur eru að leita að í dag.“

Í tilkynningunni segir að Thule verði glútenfrír, með minna af kolvetnum og færri kaloríum „en gengur og gerist“, og það án þess að fórna bragði eða upplifun.

Brugghúsið segist gera þetta til að mæta breyttum áherslum neytenda sem leiti í auknum mæli að léttari valkostum.

Þá hyggst Coca Cola ráðast í auglýsingaherferð vegna breytinganna en Hugleikur Dagsson grínisti skrifar handritin í þeirri herferð, samkvæmt tilkynningunni.