Leidd út í járnum eftir lögregluaðgerð í Skip­holti

Samkvæmt sjónarvotti fylgist töluverður fjöldi fólks með aðgerðum lögreglu við vettvang að Skipholti 9. Þar sást maður dreginn út af sérsveitarmönnum og kona sem leidd var út í járnum. Þá virðast vera rauðir blettir á hettupeysu sem hún var klædd í. 

Skúli Jónsson aðstoðaryfirlögregluþjónn segir í samtali við Vísi að lögreglu hafi klukkan 12:08 borist tilkynning um að brotist hefði verið inn í húsnæðið. Einn bíll í næstu götu hafi verið fyrstur á vettvang.

„Tilkynningin er með þeim hætti að það fara þarna fleiri auk sérsveitar sem er alltaf á vakt. Þarna höfðu karl og kona á fertugsaldri brotist inn, þau brutu rúðuna í útidyrahurðinni til að komast inn.“

Konan hafi þannig skorið sig við innbrotið sem útskýri hvers vegna blóðblettir voru á fötum hennar. Skúli segir manninn hafa verið í annarlegu ástandi, um óreglu fóllk sé að ræða með langan brotaferil að baki. Þau hafi bæði verið færð í fangageymslu og verði yfirheyrð síðar í dag.

Fréttin var uppfærð eftir að náðist í lögreglu.