Sátu um tóman banka í sex tíma

Um klukkan níu í morgun, að staðartíma, er einn maður sagður hafa gengið upp að ökumanni brynvarins bíls, sem var að flytja reiðufé til eða frá bankanum, ógnað honum og þvingað hann inn í bankann.

Við það hófst umsátur, miðað við það sem lögreglan sagði í morgun. Bankinn var umkringdur og sagði talsmaður lögreglunnar að talið væri að nokkrir ræningjar héldu ótilgreindum fjölda fólks inni í bankanum.

Sjá einnig: Bankarán varð að gíslatöku

Lögreglan bað fólk um að halda sig heima og sagði að ógnin gagnvart bæjarbúum væri takmörkuð. Lögreglan hefði stjórn á aðstæðum.

Svo virðist sem það hafi ekki reynst rétt.

Í frétt Bild segir að eftir um sex klukkustundir hafi sérsveitarmenn ruðst inn í bankann. Þar hafi engir ræningjar fundist heldur eingöngu tveir starfsmenn bankans sem höfðu verið læstir inni í hvelfingu bankans.

Enn sem komið er eru upplýsingar um stöðuna í Sinzig nokkuð óljósar. Ekki er vitað hve margir ræningjarnir voru, hvort þeir komust undan með eitthvað þýfi eða af hverju lögreglan taldi að þeir væru inni í bankanum með gísla.

Til stendur að ræða við starfsmennina tvo sem fundust inni í hvelfingunni. Þá stendur yfir leit að ræningjunum og er ekki talið að þeir séu í nánd við bankann.