Ekið á hjólreiðamann

Lárus Steindór Björnsson, varðstjóri hjá slökkviliðinu á höfuðborgarsvæðinu, staðfestir að sjúkrabílar eru á vettvangi að bregðast við umferðarslysi. Tilkynningin barst klukkan hálf tíu.

Samkvæmt sjónarvottum varð hjólreiðamaður fyrir bíl og var hann borinn upp í sjúkrabíl. Á myndum af vettvangi má sjá að ökumaðurinn var að keyra deilibíl í eigu Hopp. Ekki liggja fyrir upplýsingar um líðan hjólreiðamannsins en höggið virðist hafa verið töluvert þar sem framrúða bílsins varð fyrir miklum skemmdum.

Enn er unnið á vettvangi en töluvert af sjúkrabílum og lögreglubílum eru á svæðinu.

Miðað við gögn frá Sjóvá eru umrædd gatnamót þau hættulegustu með tilliti til slysa. 

Fréttin verður uppfærð.