„Bað hann um að segja mér ekki að fokka mér“

Atvikið átti sér stað í þann mund sem flautið gall og þriðja leikhluta lauk. LeDay, sem átti risastóran þátt í naumum sigri Stjörnunnar gegn Tindastóli í kvöld, hoppaði þá utan í Arnar eins og sjá má í lok myndbandsins hér að neðan.

Þeir létu einhver orð falla og Andri Már Eggertsson spurði Arnar út í þetta eftir spennuleikinn mikla í kvöld:

„Þegar hann hljóp á mig og sagði mér að fokka mér?“ spurði Arnar og var augljóslega ekki skemmt. „Ég bað hann bara um að segja mér ekki að fokka mér, ég kynni ekki að meta það,“ bætti hann við.

LeDay var hins vegar í miklu stuði innan vallar í kvöld og endaði með 27 stig og 15 fráköst. Hann var ekki síst öflugur í lokin og skoraði sex af síðustu átta stigum Stjörnumanna, þar á meðal úr vítaskotunum tveimur, fjórum sekúndum fyrir leikslok, sem á endanum tryggðu sigurinn. Stuðningsmenn Tindastóls reyndu þá allt til þess að trufla Bandaríkjamanninn sem stóðst hins vegar pressuna vel.

Stjarnan er því með 1-0 forskot eftir fyrsta leik en Tindastóll getur jafnað á laugardagskvöld þegar liðin mætast í Garðabænum. Vinna þarf þrjá leiki til að komast í úrslitaeinvígið.