Orbán gæti enn sigrað þrátt fyrir dökkt út­lit í könnunum

Mikið hefur verið gert úr möguleikanum á að Orbán verði loks velt úr sessi eftir sextán ár á forsætisráðherrastóli. Miðhægriflokkurinn Tisza undir forystu Péters Magyar mælist með tíu prósenta forskot á Fidesz-flokk Orbán samkvæmt meðaltali kannana hjá evrópska dagblaðinu Politico.

Ungverska stjórnarandstaðan er þó brennd af fyrri falsvonum. Hún virtist eygja möguleika á sigri fyrir síðustu kosningar árið 2022 þegar kannanir bentu til þess að mjótt yrði á munum. Niðurstaðan var hins vegar aukinn meirihluti Fidesz á þingi.

Ástæðan er ekki síst flókið kosningakerfi í Ungverjalandi og hvernig Orbán hefur hagrætt kjördæmaskipan í eigin þágu í valdatíð sinni. Þannig fékk flokkurinn tæp 68 prósent þingsæta út á 54 prósent atkvæða á landsvísu fyrir fjórum árum.

Hatrömm barátta

Kosningabaráttan hefur verið hatrömm til þessa. Magyar sakaði stjórn Orbán um að njósna um sig til þess afla upplýsinga um hann sem geti komið honum illa.

Orbán hefur beint spjótum sínum að miklu leyti að Úkraínu og Evrópusambandinu og meintri þjónkun stjórnarandstöðunnar við það. Hann hefur verið lykilbandamaður Vladímírs Pútín Rússlandsforseta í Evrópu og tafið og komið í veg fyrir að Evrópusambandið aðstoði Úkraínumenn.

Nýlega var greint frá því að Orbán hefði boðið Pútín aðstoð sína í símtali í haust og að utanríkisráðherra Ungverjalands hefði hlaupið með upplýsingar af leiðtogafundum ESB beint í rússneskan starfsbróður hans.

Orbán hefur forherst í andstöðunni við Úkraínu á undanförnum vikum. Hann lýsti Úkraínu óvin Ungverjalands í kosningabaráttunni og skrúfaði fyrir mikilvæga gasleiðslu þangað.

Forsætisráðherrann nýtur stuðnings Bandaríkjastjórn sem sendi J.D. Vance, varaforseta, til Búdapest í vikunni til þess að hjálpa bandamanni hennar í kosningunum. Margir bandarískir repúblikanar líta á valdboðsdrifna kristna þjóðernishyggju Orbán sem fyrirmynd.

Rússar hafa einnig brotið heilann um hvernig þeir gætu komið Orbán til bjargar. Bandaríska blaðið Washington Post sagði í síðasta mánuði að rússneska leyniþjónustan hefði skoðað að sviðsetja banatilræði gegn Orbán til þess að afla honum samúðarfylgis.

Margslungið kosningakerfi

Búist er við fyrstu tölum strax á sunnudagskvöld og fyrstu spám um dreifingu þingsæta upp úr miðnætti að staðartíma.

Utankjörfundaratkvæði Ungverja sem eru búsettir erlendis eru sögð líkleg til þess að geta haft mikil áhrif á úrslitin á landsvísu. Aldrei áður hafa eins margir verið á kjörskrá erlendis, tæplega hálf milljón manna.Afgerandi meirihluti Ungverja erlendis greiddi Fidesz atkvæði síðast, rúm níutíu prósent.

Kosningakerfið í Ungverjalandi er tvískipt og allflókið í framkvæmd. Meirihluti þingmanna á ungverska þinginu er kosinn í einmenningskjördæmum en tæpur helmingur í gegnum landslista.

Atkvæði sem eru greidd í einmenningskjördæmunum eru að hluta til einnig talin í kosningu landslistanna, þar á meðal atkvæði sem þingmenn sem sigruðu í sínum kjördæmum hlutu umfram þau sem þeir þurftu til sigurs. Gagnrýnt hefur verið að með þessum hætti hafi í raun verið innleitt kosningakerfi þar sem sá flokkur sem fær flest atkvæði fær alla þingmennina líkt og tíðkast til dæmis í Bretland og Bandaríkjunum.