Heilluðust af Ölfu Brá á HM og sömdu við hana

Alfa vakti athygli forráðamanna Thüringer með framgöngu sinn í vörn Íslands á HM í handbolta í vetur, á sínu fyrsta stórmóti.

Þessi tvítuga, 180 sentímetra skytta fer til Thüringer í sumar frá Fram þar sem hún hefur spilað frá árinu 2023. Hún kveðst afar spennt enda Thüringer í 4. sæti þýsku deildarinnar og nýbúið að spila úrslitahelgina í þýska bikarnum, þar sem liðið endaði þó í 4. sæti.

„Ég er gríðarlega spennt fyrir því að koma til Thüringer HC. Þetta er metnaðarfullt og virt félag, og ég tel að þetta sé hárréttur staður fyrir mig. Ég hlakka til næsta kafla og mun leggja allt í sölurnar fyrir liðið,“ sagði Alfa í tilkynningu á heimasíðu félagsins.

Herbert Müller, þjálfari Thüringer, er himinlifandi með að fá Ölfu og telur að þar með sé leikmannahópurinn klár fyrir næstu leiktíð.

„Til þess að klára að fullmóta hópinn fyrir nýja leiktíð þá vantaði okkur toppvarnarmann. Það var þá sem Alfa vakti athygli okkar á síðasta heimsmeistaramóti. Hún er aðeins tvítug en hefur gríðarlega mikla möguleika til að þróast og er þegar orðin leiðtogi og sterkur hlekkur í vörn Íslands. Hún var ansi uppnuminn vegna möguleikans á að koma til THC og ég er sannfærður um að hún geri frábæra hluti með liðinu,“ sagði Müller.