Sam­þykktu stærðarinnar launapakka Musks

Musk er þegar stærsti hlutafjáreigandi Tesla en hann á um fimmtán prósent í félaginu. En þessi nýi pakki felur í sér að hann fær töluvert meira af hlutabréfum í Tesla, í tólf áföngum, ef honum gengur vel.

Hluthafar sem eiga meira en 75 prósent af hlutabréfum Tesla samþykktu launapakkann.

Samkvæmt Wall Street Journal myndi Musk fá fleiri hluti í Tesla í tólf áföngum á næstu árum og myndi hann þá eiga um fjórðung í félaginu. Sú sviðsmynd veltur þó meðal annars á því að markaðsvirði Tesla fari í 8,5 billjónir dala (8.500.000.000.000). Tesla er núna metið á 1,5 billjónir dala.

Stjórn Tesla hafði sagt pakkanum ætlað að hvetja Musk til að umbreyta félaginu. Auk þess að framleiða rafmagnsbíla eigi það að framleiða sjálfkeyrandi bíla, sjálfstýrða leigubíla og vélmenni.

Fyrri pakki dæmdur ólöglegur

Musk hefur að miklu leyti starfað launalaust fyrir Tesla á undanförnum árum eftir að umfangsmikill kaupréttarsamningur sem gerður var við hann árið 2018 var dæmdur ólöglegur.

Vörumerkið Tesla hefur beðið mikla hnekki af bandalagi Musks við Donald Trump, forseta Bandaríkjanna. Vinstri sinnað fólk í Bandaríkjunum og í Evrópu dró úr kaupum á bílum frá Tesla og það sama gerðist á hægri vængnum í Bandaríkjunum, þegar allt fór í háaloft milli Musks og Trumps.

Þá hefur Musk einnig verið upptekinn við að reka xAI og SpaceX, auk annarra fyrirtækja hans.

Sjá einnig: Vilja að Musk fái allt að 122 billjónir á næsta áratug

Eftir að pakkinn var samþykktur steig Musk á svið á fundi hluthafa Tesla og sagði að með ákvörðun þeirra hefðu þeir ekki verið að opna nýjan kafla í sögu félagsins, heldur hefðu þeir verið að opna nýja bók.

Musk hafði hótað því að hætta að reka það ef pakkinn yrði ekki samþykktur. Eins og fram kemur í frétt Wall Street Journal sagði Musk að hann vildi eiga svo stóran hlut í félaginu að hann gæti tryggt að „vélmennaherinn“ sem hann væri að þróa endaði ekki í röngum höndum.

Hann sagðist einnig ekki vilja eiga svo stóran hlut að ekki væri hægt að reka hann ef hann missti vitið.

Allir muni vilja eiga vélmenni frá Tesla

Eftir að pakkinn var samþykktur sagðist Musk einnig vera sannfærður um það að vélmenni Tesla, sem kallast nú Optimus, í höfuð Optimus Prime, yrði mögulega „stærsta vara allra tíma“, svo miklu munaði.

Allir myndu vilja eiga vélmenni frá Tesla á komandi árum. Hann sagði að félagið myndi selja tugi milljarða þessara vélmenna. Tugir milljarða af þessum vélmennum yrðu seld.

Þá sagði Musk að öryggi yrði mikilvægt og gaf til kynna að hann vildi ekki að þetta ferli endaði með því að vélmennin tækju yfir jörðina með því að vísa til kvikmyndar eftir James Cameron, sem er væntanlega Terminator.

Til að koma þessu ferli í gang sagði Musk að Tesla myndi fara í einhverja stærstu uppbyggingu sögunnar og reisa stærðarinnar verksmiðjur, sem framleiða eigi þessi vélmenni. Markmiðið væri að framleiða hundrað milljón vélmenni á ári og sagði að kannski myndi það enda í einum milljarði á hverju ári.

Hann sagði að framleiðsla á rafmagnsbílum yrði einnig aukin töluvert.

Áhugasamir geta horft á hluthafafundinn og ávarp Musks í spilaranum hér að neðan.