Davos-toppur hættir vegna Ep­stein-tengsla

WEF, sem stendur fyrir stórri árlegri ráðstefnu í Davos, hóf rannsókn á Brende fyrr í þessum mánuði eftir að skjöl sem bandaríska dómsmálaráðuneytið birti úr rannsóknum á Epstein vörpuðu ljósi að samband þeirra í gegnum árin.

Þeir snæddu saman í þrígang frá 2018 til 2019 og skiptust bæði á textaskilaboðum og tölvupóstum. Brende þrætti fyrir það í nóvember. 

Síðar viðurkenndi hann að hafa þekkt Epstein en að hann hafi ekki vitað af glæpum hans sem hann vildi að hann hefði kynnt sér betur. Epstein hlaut dóm fyrir kynferðisbrot árið 2008 og var handtekinn vegna gruns um mansal og kynferðisbrot árið 2019.

Brende var áður utanríkisráðherra Noregs frá 2013 til 2017. Þá tók hann við forsæti Alþjóðaefnahagsráðsins. Alois Zwinggi, framkvæmdastjóri WEF, tekur við sem starfandi forseti og forstjóri þess.

Epstein-skjölin svonefndu hafa valdið miklum usla í Noregi. Lögreglan rannsakar nú Þorbjörn Jagland, fyrrverandi forsætisráðherra og framkvæmdastjóra Evrópuráðsins, eftir uppljóstranir úr skjölunum og orðspor norsku konungsfjölskyldunnar beið hnekki vegna vinaþels Mette-Marit krónprinsessu og Epstein.