Setja gjald á hraðtískuvörur

Gjaldið gæti verið allt að 19,5 evrum á hverja flík eða tæpar 2800 krónur. Sú upphæð getur haft áhrif þar sem hraðtískuvörur eru oft afar ódýrar. Gjaldið tók gildi í dag og er í samræmi við ný lög í Frakklandi. Nýju lögin höfðu það að markmiði að setja regluverk í kringum hraðtískufyrirtæki á við Shein, Temu og AliExpress.

Viðskiptaráðuneyti Kína hefur lýst frönsku lögunum sem mismunun og viðskiptahindrun samkvæmt BBC. Þau brjóti gegn reglum Alþjóðaviðskiptastofnunarinnar. Mathie Lefevre, franskur ráðherra, sagði hins vegar að skaðleg áhrif hraðtísku á umhverfið og efnahagslífið væru vel þekkt.

Hraðtíska er þegar framleiðslan er hröð og áhersla er lögð á að framleiða sem mest fyrir sem minnstan kostnað til þess að halda í við nýjustu tísku. Mikil umhverfismengun getur fylgt slíkri framleiðslu auk þess sem að starfsfólk er oft á lágum launum og vinnur við hættulegar aðstæður samkvæmt Vísindavefnum.

Löggjöfin skilgreinir hraðtísku út frá tveimur þáttum. Í fyrsta lagi er það magn fatnaðar sem er settur á markað og í öðru lagi kostnaður við viðgerð á flíkunum í hlutfalli við kaupverð þeirra. Gjaldið er síðan ákvarðað eftir því hvernig hver vara stenst þessa tvo staðla. 

Gjaldið verður hins vegar aldrei hærra en fimmtíu prósent af verði vörunnar fyrir skatt. Í svari Shein við fyrirspurn BBC segir að löggjöfin myndi skerða kaupmátt franskra neytenda.