Sam­einaði SpaceX og xAI og vill reisa gagnaver á braut um jörðu

Samkvæmt Wall Street Journal er SpaceX nú metið á um 1,25 billjónir dala, sem samsvarar rúmum 154 billjónum króna (tólf núll).

SpaceX hefur hingað til gengið út á að skjóta endurnýtanlegum eldflaugum út í geim og að reka umfangsmikið net Starlink-samskiptagervihnatta á braut um jörðu, sem veita milljónum manna aðgang að netinu. xAI er fyrirtæki sem stofnað var utan um þróun gervigreindarinnar Grok og það fyrirtæki hefur einnig rekið samfélagsmiðilinn X (áður Twitter).

SpaceX er þróað fyrirtæki sem hefur aðgang að miklum tekjum, bæði frá bandaríska ríkinu og fjölda viðskiptavina um heiminn allan. Samkvæmt heimildum New York Times vonast Musk til þess að halda hlutafjárútboð í sumar.

Fyrirtækið xAI var stofnað á eftir öðrum stórum gervigreindarfyrirtækjum og hefur Musk varið milljörðum dala í að reyna að vinna upp forskot hinna fyrirtækjanna. SpaceX hefur áður fjárfest fyrir tvo milljarða dala í xAI og stóð til að bílaframleiðandinn Tesla (sem er annað fyrirtæki Musks) myndi gera það einnig.

Í minnisblaði sem birt var á vef SpaceX í gærkvöldi segist Musk hafa áhuga á því að smíða gagnaver í geimnum. Þannig vilji hann nýta sér nánast stöðuga sólarorku og í senn kælingu í geimnum með tiltölulega litlum viðhaldskostnaði.

Musk segist þeirrar skoðunar að innan tveggja til þriggja ára verði ódýrasta leiðin til að reka gervigreind sú að koma tölvubúnaðinum og gagnaverunum sem til þarf fyrir í geimnum. Þar muni SpaceX spila stóra rullu.

„Það er alltaf sólríkt í geimnum!“ skrifaði Musk.

Þá tilkynntu forsvarsmenn SpaceX í síðustu viku að þeir vildu koma fyrir um milljón smágervihnöttum á braut um jörðu og eiga þeir að mynda hið umrædda gagnaver.

Musk segir einnig í minnisblaðinu að á þessu ári standi til að nota Starship-geimfar SpaceX til að senda nýja kynslóð Starlink-gervihnatta á braut um jörðu.

Þróun geimfarsins hefur ekki farið eftir áætlunum forsvarsmanna SpaceX á undanförnum árum.