Rússar nærri stærstu landvinningunum í rúm tvö ár

Sóknin að Pokrovsk er talin hafa kostað Rússa verulega en borgin er að miklu leyti í rúst eftir átökin.

Í frétt Wall Street Journal segir að um þriðjungur tilkynntra bardaga á allri 1.200 kílómetra langri víglínunni, eigi sér stað í eða við Pokrovsk. Úkraínskir hermenn hafa lýst gífurlega hörðum átökum en Úkraínumenn hafa sent liðsauka á svæðið og reyna að reka Rússa á brott.

Það var í seinni hluta júlí sem rússneskum hermönnum tókst fyrst að sækja fram inn í Pokrovsk og var útlit fyrir að borgin væri nálægt því að falla í hendur Rússa.

Á undanförnum vikum hefur sóknarþungi Rússa aukist mjög og slæmt veður, sem gerir notkun dróna erfiða, hefur gert Rússum kleift að senda sífellt fleiri hermenn inn í borgina. Úkraínumenn verjast enn og þykir staðan þar mjög flókin og erfitt að finna einhverja skýra víglínu.

Hér að neðan má sjá stöðuna í Pokrovsk samkvæmt korti DeepState en hópurinn er sagður hafa heimildarmenn í úkraínska hernum.

Í færslu á Telegram-síðu DeepState segir að staðan í borginni sé í raun flóknari en kortið gefi til kynna þar sem úkraínskir hermenn og rússneskir séu á víð og dreif um borgina.

Þar að auki segir að útlit sé fyrir að hópur rússneskra hermanna hafi verið umkringdur í borginni.

Í frétt WSJ segir að rússneskir hermenn séu nú orðnir fleiri en þeir úkraínsku í borginni og að Rússar hafi náð yfirburðum þegar komi að notkun dróna.

Úkraínski miðillinn Hromadske birti á dögunum grein þar sem haft var eftir úkraínskum hermönnum að Rússar finni glopur á vörnum þeirra og komi sveitum í gegnum víglínuna. Þar leggi þeir áherslu á að elta upp drónasveitir og sprengivörpulið Úkraínumanna.

Einn yfirmaður á svæðinu segir að þessar sveitir, sem séu fyrir aftan víglínuna, lendi nú oftar í skotbardögum en hermenn á víglínunni sjálfri. Hermenn beggja fylkinga eru sagðir forðast það að opinbera stöður sínar vegna þess að um leið og þeir gera það er ráðist á þá með sjálfsprengidrónum.

Vatn á myllu Pútíns

Falli Pokrovsk í hendur Rússa myndi borgin Myrnohrad einnig líklega falla, þar sem hún yrði umkringd Rússum. Óljóst er hversu margir úkraínskir hermenn eru þar en erfitt yrði fyrir þá að hörfa, vegna áðurnefndra dróna

Landvinningarnir yrðu þeir stærstu frá því borgin Bakhmut féll í hendur Rússa fyrir um tveimur og hálfu ári síðan. Hann virðist þó hafa kostað Rússa mjög í hermönnum og hergögnum og borgin sjálf er lítið annað en rústir einar.

Sérfræðingar segja Úkraínumenn hafa aðrar varnarlínur klárar norður af borginni og fall Pokrovsk myndi líklega ekki opna á einhvers konar skyndisókn Rússa gegnum línur Úkraínumanna.

Fall borgarinnar yrði þó líklega vatn á myllu Vladimírs Pútín, forseta Rússlands, og tilrauna hans til að sannfæra menn eins og Donald Trump, kollega hans í Bandaríkjunum, um að sigur Rússa sé óumflýjanlegur.

Í samtali við New York Times segir Laura Cooper, sem starfaði í varnarmálaráðuneyti Bandaríkjanna í tíð Joes Biden, að í raun sé merkilegt hve langan tíma það hefur tekið Rússa að ná yfirburðum í Pokrovsk, miðað við það að hernám borgarinnar, og alls Dónetskhéraðs, sé eitt af helstu markmiðum Pútíns.

Úkraínumenn stjórna enn nokkuð stórum hluta héraðsins.