Ekkert fékkst upp í 100 milljóna gjald­þrot Banka­strætis club

Í auglýsingu í Lögbirtingablaðinu segir að félagið hafi verið tekið til gjaldþrotaskipta þann 19. febrúar síðastliðinn. Engar eignir hafi fundist í búinu og skiptum í því hafi verið lokið 27. ágúst 2025 án þess að greiðsla fengist upp í lýstar kröfur.

Samkvæmt fyrirtækjaskrá var félagið í eigu athafnamannsins Sverris Einars Eiríkssonar en það var upphaflega í jafnri eigu þeirra Birgittu Lífar Björnsdóttur og félaganna RK bygg ehf. og KS 24 ehf. RK bygg er í eigu Þórlaugar Ólafsdóttur og KS 24 er í eigu Karenar Rutar Sigurðardóttur. Karen Rut er eiginkona Sverris Þórs Gunnarssonar, sem hlaut nýverið milljarðs króna sekt fyrir stórfelld skattalagabrot. Félag í hans eigu var áður eigandi þriðjungshlutar í B Reykjavík.

Vildi auka fjölbreytni

Bankastræti club var stofnaður í júlí árið 2021 af Birgittu Líf, áhrifavaldi og World Class-erfingja. Staðurinn var reistur á rústum gamalgróna skemmtistaðarins B5, sem lengi var rekinn í sama húsi, að Bankastræti 5 í Reykjavík.

Á sínum tíma sagði Birgitta að uppleggið hafi verið að opna skemmtistað sem væri nokkuð frábrugðinn þeim sem fyrir voru í miðbænum.

„Mig langaði að auka fjölbreytnina hérna í miðbænum. Ég hef farið á nokkra staði úti í Miami og LA og mig langaði að fanga þá stemningu,“ sagði Birgitta Líf Björnsdóttir, eigandi Bankastræti Club, í kvöldfréttum Stöðvar 2.

Bankastræti club varð B5, B og fljótlega Kabarett

Sverrir Einar Eiríksson, sem um þessar mundir er helst kenndur við Nýju vínbúðina, tók við rekstri Bankastrætis club sumarið 2023 og boðaði breytingar. Fyrst breytti hann heiti staðarins í B5 en eftir að eigendur heitisins B5 hótuðu öllu illu breytti hann heitinu í B.

Hann hóf þó að kalla staðinn B5 á ný skömmu síðar en skellti svo í lás í byrjun maí í fyrra. Vísir greindi svo frá því í byrjun ágúst að unnið væri að því að opna nýjan stað í Bankastræti 5. 

Staðurinn, sem ber nafnið Kabarett, verður í senn fjöllistahús og vettvangur fyrir hinar ýmsu listir.

Bræðurnir Sverrir og Sigurjón Garðarssynir standa að baki nýja staðnum. Í samtali við fréttastofu sagði Sverrir hugmyndina hafa sprottið hjá bróður sínum, sem á hlut í brugghúsinu Hella bjór, sem bruggar meðal annars mjöð.

Sá staður hefur ekki enn verið opnaður, eftir því sem blaðamaður kemst næst.

Fréttin hefur verið leiðrétt. Upphaflega var ritað að félagið hefði verið í eigu upphaflegra eigenda þegar það var tekið til gjaldþrotaskipta en þá var það komið í fulla eigu Sverris Einars. Ástæðan er sú að samkvæmt nýjasta, og raunar eina, ársreikningi félagsins er upphaflegu eigendurnir enn skráðir sem slíkir.