Ein­kunnir á móti Frakk­landi: Engin orka og engin trú

Íslenska liðið hafði augljóslega unnið sér það inn með góðri frammistöðu á mótinu að fá fulla virðingu frá franska liðinu. Þeir tóku okkur heldur betur alvarlega og bætti einbeittir og grimmir til leiks.

Íslenska liðið var yfirspilað frá fyrstu mínútu og franska liðið var komið í 50-17 eftir þrettán mínútna leik. Frakkar skoruðu af vild og strákarnir voru ekki að hitta úr opnum skotum.

Craig Pedersen gerði þrjár breytingar á fimm manna byrjunarliðinu og snerist það örugglega eitthvað um að skipta þreyttum fótum fyrir ferska fætur. Þetta leit hins vegar út eins og það væri bara verið að gefa leikinn.

Tveir af þeim sem hafa spilað minnst á mótinu komu inn í liðið og það var ekki til að auka trúna á verkefnið. Allt í lagi að leyfa þeim að spila mínútur en stórfurðuleg ákvörðun að láta þá báða byrja leikinn.

Eftir fyrri hálfleikinn höfðu þeir aðeins hitt úr einu af átta skotum sínum og tapað fjórum boltum.

Um miðjan annan leikhluta var bekkurinn hjá Frökkum kominn með 32 stig á sama tíma og íslenska liðið var með 24 stig samanlagt eða átta stigum minna.

Lykilmenn voru örugglega margir útkeyrðir og orkulausir en það að leggjast flatir frá fyrstu mínútu var eitthvað sem enginn bjóst við af þessu liði. Engin trú og engin orka á móti liði eins og Frakklandi þýðir bara eitt - stór skellur.

Þetta var sorglegur endir á móti þar sem íslenska liðið var svo grátlega nálægt sínum fyrsta sigri á stórmóti.

Hér fyrir neðan má sjá hvernig íslensku strákarnir stóðu sig í dag.

Byrjunarliðið:

Sigtryggur Arnar Björnsson, bakvörður 1

3 stig á 20:37 mínútum (PlúsMínus: -28 Framlag: 1)

Óskiljanleg ákvörðun að láta hann byrja leikinn eftir að hann spilaði í samtals þrjár mínútur í síðustu þremur leikjum. Það var eins og þjálfarateymið væri að réttlæta veru hans í hópnum. Hefur nánast ekkert gert þær mínútur sem hann spilaði og það var lítil breyting á því.

Hilmar Smári Henningsson, bakvörður 2

9 stig á 20:39 mínútum (PlúsMínus: -23 Framlag: 4)

Það er miklu meira vita í því að taka Hilmar inn í byrjunarliðið. Framtíðarmaður sem hefur komið hugaður, hungraður og hugrakkur inn í leikina. Átti samt erfitt uppdráttar á móti hraustum Frökkum en fékk dýrmæta reynslu áður en hann fær stærra hlutverk hjá liðinu. Hitti hræðilega en mætti inn á gólfið til að láta til sín taka.

Martin Hermannsson, bakvörður 4

15 stig á 16:09 mínútum (PlúsMínus: -25 Framlag: 15)

Eini leikmaður íslenska liðsins sem var að gera eitthvað á afar erfiðum upphafsmínútum. Algjör yfirburðamaður í íslenska liðinu í dag. Gerði allt með hæfilegri blöndu af yfirvegun, áræðni og útsjónarsemi.

Orri Gunnarsson, framherji 2

7 stig á 24:36 mínútum (PlúsMínus: -24 Framlag: 1)

Hefur farið hvað eftir annað úr því að byrja leiki í það að varla koma inn á völlinn í leikjum íslenska liðsins. Þvílík harmonikku meðferð frá þjálfarateyminu. Ekki til að auka trúna eða minnka stressið. Það verður vonandi betra næst því þetta er framtíðarmaður hjá liðinu. Hlutirnir gengu ekki upp hjá honum núna en þeir gera það næst. Seinni hálfleikurinn í dag var strax betri og hann hætti ekki sem er plús.

Tryggvi Snær Hlinason, miðherji 3

8 stig og 5 fráköst á 20:50 mínútum (PlúsMínus: -24 Framlag: 15)

Tryggvi fékk loksins að hvíla aðeins lúin bein eftir að hafa varla farið af velli í fyrstu fjórum leikjunum. Virkaði þreyttur og bensínlítill eftir átök síðustu viku. Rólegur leikur á hans mælikvarða.

Komu inn af bekknum

Elvar Már Friðriksson, bakvörður 3

10 stig á 18:43 mínútum (PlúsMínus: -22 Framlag: 7)

Var hent út úr byrjunarliðinu sem kom flestum örugglega á óvart. Hitti ekki vel þegar hann kom inn á völlinn og lenti einnig í villuvandræðum. Átti erfitt með að koma sér inn í leik sem var nánast búinn þegar hann kom inn á völlinn. Sýndi aðeins meira í seinni hálfleiknum.

Jón Axel Guðmundsson, framherji 2

4 stig á 17:45 mínútum (PlúsMínus: -14 Framlag: 7)

Það er hægt að segja það sama um svo marga lykilmenn íslenska liðsins sem voru búnir að leggja mikið á sig til þessa í mótinu. Orkustöðvarnar voru næstum því tæmdar og Jón Axel var engin undantekning.

Almar Orri Atlason, framherji 1

2 stig á 12:43 mínútum (PlúsMínus: -16 Framlag: -5)

Það gekk ekkert hjá honum í dag. Fékk nokkur góð skot en hitti ekki. Var að reyna að skora sín fyrstu stig á Evrópumótinu og þau komu loksins með troðslu 33 sekúndum fyrir leikslok úr níunda skoti hans á mótinu.

Ægir Þór Steinarsson, bakvörður 3

0 stig á 4:59 mínútum (PlúsMínus: -5 Framlag: 3)

Kom inn og reyndi að keyra menn í gang og leikur liðsins lagðist auðvitað um leið, sérstaklega á varnarvellinum. Fékk samt lítið að spila og fyrirliðinn steig til hliðar til að leyfa öðrum leikmönnum að njóta sín.

Kristinn Pálsson, framherji 3

7 stig á 17.58 mínútum (PlúsMínus: -17 Framlag: 5)

Gerði ekkert þegar hann kom inn á völlinn í fyrri hálfleiknum en það gekk mun betur í þeim seinni þar af hann setti meðal annars niður þrist og víti að auki.

Styrmir Snær Þrastarson, framherji 4

9 stig á 13:29 mínútum (PlúsMínus: +8 Framlag: 12)

Átti þrjár flottar troðslur í seinni hálfleiknum og stendur sig oftast vel í vörninni. Það verður gaman að sjá hann fá meiri trú í sókninni því hann er einn af þessum mönnum sem við þurfum að veðja á í framtíðinni. Hann sýndi flotta spretti í lokin.

Kári Jónsson, bakvörður 2

0 stig á 11:32 mínútum (PlúsMínus: -10 Framlag: 4)

Sá eini sem fékk ekki að spila í fyrri hálfleiknum en stýrði leik liðsins ágætlega í lokin

Craig Pedersen, þjálfari 2

Þjálfarateymið féll á prófinu alveg eins og íslensku strákarnir. Furðulegt byrjunarlið gaf ekki rétta tóninn fyrir þennan leik og liðið náði aldrei að kveikja á sér. Tók þá ákvörðun að hvíla lykilmenn og dreifa mínútum á menn en því miður var lítið beníns á flestum tönkum í leikmannahópnum. Virkaði úrræðalaus og útkeyrður á bekknum eins og flestir leikmenn. Ömurlegur endir á móti sem hefði getað farið allt öðruvísi.