Fjórir ráðnir nýir fag­stjórar hjá Kvik­mynda­skólanum

Þetta kemur fram í tilkynningu en haustönn skólans hefst 8. september næstkomandi. Þar segir jafnframt að skólinn hafi nú fengið framtíðarhúsnæði í kvikmyndaveri Stúdíó Sýrlands, Vatnagörðum 4 í Reykjavík.

„Kvikmyndaskóli Íslands hefur fjögur fagsvið, Leikstjórn og framleiðsla, Handrit og leikstjórn, Skapandi tækni og Leiklist. Nýir fagstjórar sviðanna fjögurra eru:

Þorsteinn Bachmann – Leiklist, Gunnar Björn Guðmundsson – Leikstjórn og framleiðsla / Handrit og leikstjórn, Hafsteinn Gunnar Sigurðsson – Leikstjórn og framleiðsla / Handrit og leikstjórn og Jonathan Devaney – Skapandi tækni og yfirkennari KÍ. Þá hefur Þórunn Clausen verið ráðin sem leiklistarkennari við skólann.

Þorsteinn Bachmann – Leiklist fyrir kvikmyndir

Þorsteinn Bachmann er landsþekktur leikari og margverðlaunaður fyrir list sína.

Hann hefur fjölbreytta reynslu tengda leiklistinni sem leikari, leikhússtjóri, leiklistarkennari, leikstjóri og kvikmyndaframleiðandi. Þorsteinn útskrifaðist frá Leiklistarskóla Íslands 1991. Hann fékk diplólma frá Kvikmyndaskóla Íslands 1992 og hefur síðan sótt fjölda námskeiða í list sinni hérlendis auk þess að afla sér framhaldsmenntunar í kennslu og listsköpun hjá Míchael Chekhov Association í Bandaríkjunum frá árinu 2018.

Gunnar Björn Guðmundsson – Leikstjórn og framleiðsla / Handrit og leikstjórn

Gunnar Björn lauk námi í kvikmyndagerð frá Kvikmyndaskóla Íslands árið 1992 og hefur síðan þá starfað sem leikstjóri og handritshöfundur í kvikmyndum, sjónvarpi og leikhúsi. Hann lagði stund á nám við Listaháskóla Íslands árið 2005 í faginu Fræði og framkvæmd (sviðslistabraut).

Hann hefur leikstýrt fjórum kvikmyndum í fullri lengd: Konunglegt bros (2004), Astrópía (2007), Gauragangur (2010) og Amma Hófí (2019), auk fjölda stuttmynda, þar á meðal Karamellumyndinni sem hlaut Edduverðlaun 2003. Í sjónvarpi skrifaði og leikstýrði hann áramótaskaupum RÚV fjögur ár í röð (2009–2012) og vann að þáttum fyrir Ævar vísindamann, Latabæ og Björgunarbátuinn Elías. Hann stofnaði framleiðslufyrirtækið Þeir Tveir og hefur skrifað og leikstýrt yfir 400 auglýsingum.

Í leikhúsi hefur Gunnar leikstýrt yfir fjörutíu sýningum um allt land, bæði fyrir atvinnu- og áhugaleikhús.

Hafsteinn Gunnar Sigurðsson – Leikstjórn og framleiðsla / Handrit og leikstjórn

Hafsteinn Gunnar er margverðlaunaður leikstjóri og handritshöfundur sem hefur átt stóran þátt í uppgangi íslenskrar kvikmyndagerðar síðustu ár. Hann hefur leikstýrt kvikmyndunum Á annan veg (2011), París norðursins (2014), Undir trénu (2017), Last Call (2018) og Northern Comfort (2023). Verk hans hafa verið sýnd á virtum alþjóðlegum kvikmyndahátíðum og hlotið lof fyrir einstakan stíl og samhengi.

Jonathan Devaney – Skapandi tækni / Yfirkennari

Jonathan hefur starfað í kvikmyndagerð í yfir 30 ár. Starfað við fjölmörg stór alþjóðleg kvikmyndaverkefni, kvikmyndir, sjónvarpsþætti, auglýsingar og tónlistarmyndbönd. Hann hefur starfað sem fyrirlesari, ráðgjafi og kennari í kvikmyndatækni í meira en áratug. Í kennslu leggur hann áherslu á að efla bæði skapandi og tæknilega færni kvikmyndagerðafólks,“ segir í tilkynningunni.

Um skólann segir ennfremur að til viðbótar við vandaða aðstöðu, hafi orðið afar jákvæðar breytingar á högum Kvikmyndaskólans síðan í vor. „Í sumar gerði Mennta- og barnamálaráðuneytið samning við skólann um stuðning við námið, námið er aftur orðið lánshæft hjá Menntasjóði námsmanna og rekstraraðilum skólans tókst að lækka skólagjöld úr 690 þúsund krónum í 390 þúsund á önn.“