Plötuðu er­lent fyrir­tæki til að greiða sér tugi milljóna: Annar sagður hroka­fullur en hinn sýndi iðrun

Báðir hlutu skilorðsbundna dóma. Egill er dæmdur í tveggja og hálfs árs skilorðsbundið fangelsi, en Steingrímur fær þrjú ár skilorðsbundin.

Samkvæmt ákæru fóru blekkingarnar þannig fram að Steingrímur hafi hlutast til um að stofna og skrá heimasíðurnar sem voru líkt og áður segir hýstar hjá erlendu fyrirtæki. Einungis ein af þessum þremur síðum var skráð í ákveðna þjónustu fyrirtækisins sem var skilyrði fyrir því að eiga rétt á hlutdeild í tekjum vegna birtra auglýsinga á síðunum.

Egill starfaði hjá fyrirtækinu og samþykkti skráningu hinna vefsíðanna í umrædda þjónustu. Jafnframt er hann sagður hafa rangfært gögn um hlutdeild heimasíðnanna þriggja í auglýsingatekjum þannig að þær virtust eiga rétt á tekjum sem engin grundvöllur væri fyrir.

Hann hafi svo sent fölsku gögnin til bókhaldsdeildar fyrirtækisins og fyrir vikið voru umtalsverðar fjárhæðir greiddar til Steingríms.

Með þessum hætti öfluðu þeir sér tæplega 530 þúsund Bandaríkjadala, sem í dag jafngildir um 65 milljónum íslenskra króna.

Annar trúverðugur en ekki hinn

Egill játaði að mestu sök og í dómnum kemur fram að hann hafi verið samvinnuþýður við rannsókn málsins. Hann hafi einnig lýst iðrun sinni og eftirsjá.

Að mati dómsins var framburður hans trúverðugur, og ekki væri hægt að sjá að hann hefði hlíft sjálfum sér fyrir betri útkomu í málinu. Var hans framburður lagður til grundvallar í málinu.

Hins vegar neitaði Steingrímur sök alveg frá því að málið kom upp í ágúst 2018. Hann er sagður haf færst undan því að svara spurningum fyrirtækisins áður en málið fór til íslenskra yfirvalda. Í dómnum segir að sum svör hans hafi borið vott um hroka, og hann snúið út úr.

Einnig bendi gögn málsins til þess að hann hafi vitað meira en hann vildi viðurkenna. Hann hafi í raun og veru tekið ákvarðanir um og stýrt hver framvindan yrði, eða í það minnsta látið það átölulaust.

Dómnum þótti framburður Egils ótrúverðugur og var að mestu horft fram hjá framburði hans.

Þaulskipulögð og gróf brot

Þeir voru báðir sakfelldir sem aðalmenn fyrir fjársvik og peningaþvætti. Í dómnum segir að brot þeirra hafi verið sérhæfð og flókin framin með leynd af fagmönnum á viðkomandi sviði. Brot þeirra, sem hafi verið þaulskipulögð og gróf, hafi valdið miklu tjóni. Þá hafi brotavilji þeirra verið sterkur.

Fram kemur að Egill hafi gert samkomulag við fyrirtækið og þar með leitast eftir að draga úr afleiðingum brota sinna.

Dómnum þótti rétt að dæma Egil í tveggja og hálfs árs fangelsi og Steingrím í þriggja ára fangelsi. Vegna þess hve mikill dráttur málsins var þótti rétt að skilorðsbinda refsinguna.