Isavia braut lög á Kefla­víkur­flug­velli

Greint er frá því á vef Neytendastofu að hún hafi haft til skoðunar upplýsingagjöf og viðskiptahætti Isavia ohf. vegna gjaldskyldra svæða á Keflavíkurflugvelli. Stofnunin hafi nú lokið ákvörðun í málinu þar sem upplýsingagjöf og viðskiptahættir Isavia voru ekki í samræmi við lög.

Neytendastofa komst að þeirri niðurstöðu að Isavia hafi brotið gegn lögum um góða viðskiptahætti sem og reglum um verðmerkingar með því að veita neytendum ekki fullnægjandi upplýsingar um öll gjöld tengd gjaldskyldum svæðum félagsins. Þá var það álit stofnunarinnar að með hliðsjón af staðsetningu myndavéla, skorti á upplýsingum um að þjónustugjald leggist á eftir fimm mínútna viðveru og að teknu tilliti til þess þrönga tímaramma sem neytendum er gefinn til afferminga, sé tilhögun gjaldtöku í brottfararrennu Isavia viðskiptahættir sem séu óréttmætir gagnvart neytendum.

Þá komst stofnunin einnig að þeirri niðurstöðu að Isavia hafi viðhaft villandi viðskiptahætti með því að láta líta út fyrir að sjálfvirkt greiðslukerfi/gjaldtaka væri til staðar án þess að tekið væri fram að virkja þurfi það sérstaklega. Stofnunin taldi tilefni til að beita stjórnvaldssekt og nam sektarfjárhæðin fimm hundruð þúsund krónum.

Isavia innanlandsflugvellir ehf., félag í eigu Isavia sem kemur að rekstri innanlandsflugvalla, var í júní sektað fyrir óskýrar og misvísandi merkingar um gjaldheimtu á bílastæðum við Reykjavíkurflugvöll. Sú sekt hljóðaði einnig upp á hálfa milljón króna.