Innlent

Eig­andi Bjargar í á­falli en vonast til að bjarga fötum

Oddur Ævar Gunnarsson skrifar
Glerbrot má sjá á víð og dreif á götunni eftir eldsvoða næturinnar. Kristinn vonar að hægt verði að bjarga eitthvað af fötum efnalaugarinnar.
Glerbrot má sjá á víð og dreif á götunni eftir eldsvoða næturinnar. Kristinn vonar að hægt verði að bjarga eitthvað af fötum efnalaugarinnar.

Eigandi Efnalaugarinnar Bjargar á Háaleitisbraut sem brann í nótt segist vera í áfalli eftir nóttina. Um fjölskyldufyrirtæki er að ræða og segir hann mestu máli skipta að hlúa að starfsfólki en hann vonast til þess að hægt verði að bjarga einhverjum fötum sem voru þar til hreinsunar.

Líkt og fram hefur komið barst slökkviliðinu tilkynning um eldinn klukkan tvö í nótt. Slökkvistarfi lauk um tveimur tímum síðar en glerbrot má sjá á víða og dreif fyrir utan efnalaugina. 

Vettvangsrannsókn er nú í gangi samkvæmt upplýsingum frá Ásmundi Rúnari Gylfasyni aðstoðaryfirlögregluþjóni og liggur ekkert fyrir um upptök eldsins.

Kristinn Kristinsson eigandi efnalaugarinnar segist eðli málsins samkvæmt í áfalli. 

„Þetta er svakalegt áfall og mikið sjokk. Mikilvægast núna er að hlúa að starfsfólkinu og fjölskyldunni. Við erum afar þakklát fyrir það að slökkviliðið var fljótt á staðinn og fegin að það reyndust engin hættuleg efni til staðar þarna.“

Efnalaugin Björg hefur verið í eigu sömu fjölskyldu frá árinu 1953. Þá hefur hún verið til staðar á Háaleitisbraut í rúm sextíu ár, frá árinu 1967. 

Kristinn segist ekki hafa fengið að mæta í efnalaugina í dag, enda sé vettvangur til rannsóknar lögreglu. „En manni hefur sýnst vera fatnaður þarna inni sem er heill, sem þá er vonandi hægt að þrífa.“

Slökkvilið Reykjavík Verslun

Mest lesið


Fleiri fréttir

Sjá meira


×

Mest lesið