Upp­gjörið: Valur - Haukar 80-82 | Köstuðu sigrinum frá sér og klikkuðu á vítunum

Haukar sóttu 80-82 sigur á Hlíðarenda í öðrum leik undanúrslitanna gegn Val. Heimakonur leiddu leikinn nánast allan tímann en köstuðu frá sér sigrinum undir lokin, Jiselle Thomas mistókst svo að jafna á vítalínunni á lokasekúndunum. Haukar verða með sópinn á lofti í næsta leik liðanna á laugardaginn. 

Valskonur byrjuðu leikinn vel og virtust vera búnar að finna lausnir við pressuvörninni, en Haukar aðlöguðu sig fljótt og fóru aftur að gera þeim lífið leitt.

Valur var skrefinu á undan í fyrri hálfleik eftir fína byrjun og náði að viðhalda forystunni, aðallega þökk sé góðri þriggja stiga nýtingu.

Haukarnir voru hins vegar aldrei langt undan, jöfnuðu leikinn rétt fyrir hálfleik, byrjuðu síðan seinni hálfleik á góðu áhlaupi og tóku fimm stiga forystu.

Jamil Abiad, þjálfari Vals, bað strax um leikhlé til að koma sínu liði aftur á beinu brautina. Sem gekk eftir, Valur átti gott áhlaup og endaði síðan þriðja leikhlutann á þriggja stiga skotum sem gáfu þeim fimm stiga forystu fyrir fjórða leikhlutann.

Í fjórða leikhluta héldu Valskonur áfram að spila fína vörn, setja flott þriggja stiga skot og rífa niður sóknarfráköst, eins og þær höfðu gert allan leikinn. Þær héldu sér fyrir framan Haukana alveg þar til á lokasekúndum leiksins.

Köstuðu sigrinum frá sér

Þá átti sér stað skelfileg atburðarás fyrir Val, tapaður bolti og náðu svo ekki varnarfrákasti. Haukakonan Þóra Kristín fékk boltann og henti erfiðu þriggja stiga skoti ofan í til að taka forystuna á ný eftir að hafa verið undir allan fjórða leikhlutann.

Vont vítaklúður

Með rétt rúmar tvær sekúndur á klukkunni náði Valur að koma boltanum á Jiselle Thomas, sem fór upp í skot en Rósa Björk braut á henni.

Jiselle fór því á vítalínuna, með leikinn undir. Tvö skot og tveggja stiga munur, en hún klikkaði á báðum skotum og Haukar sluppu með tveggja stiga sigur.

Staðan er því 2-0 í einvíginu og Haukar verða með sópinn á lofti í næsta leik liðanna á Ásvöllum

Stjörnur og skúrkar

Ekki erfitt skúrkval, Jiselle Thomas fékk tækifæri til að jafna leikinn á vítalínunni en klikkaði úr báðum skotum. Seinna klikkið reyndar viljandi til að reyna að bjarga jafntefli. Slakur leikur líka heilt yfir hjá henni, léleg skotnýting og margir tapaðir boltar.

Þóra Kristín stjarna leiksins eftir að hafa sett niður þriggja stiga skot til að vinna hann. Annars ekki endilega hennar besta frammistaða, líkt og margar í Haukaliðinu. Í raun ótrúlegt að þær hafi unnið þennan leik.

Dómarar

Bjarki Þór, Jón Þór og Bjarni Rúnar mynduðu tríó kvöldsins. Vel haldið utan um hlutina. Duglegir að dæma á Haukana sem spiluðu grimma hápressuvörn. Eitthvað um örlítil mistök, eins og þegar Dagbjört fór óvart á vítalínuna í stað Jiselle, en ekkert stórvægilegt sem hafði áhrif á úrslit leiksins.

Viðtöl 

Þóra Kristín: Mættum svolítið illa til leiks

„Þær leystu betur úr og brutu upp pressuna, þannig að þetta varð smá torsótt“ sagði Þóra Kristín Jónsdóttir, fljótlega eftir leik.

Hún setti niður þriggja stiga skot á lokaandartökunum sem endaði á því að vinna leikinn fyrir Hauka.

„Ég man eiginlega ekki hvað var að gerast, við náðum frákastinu, ég stend beint fyrir aftan Lore og hitti.“

Jiselle Thomas klikkaði síðan á vítaskotunum sem hefðu jafnað leikinn fyrir Val.

„Það var mikill léttir. Auðvitað leiðinlegt fyrir hana en við fögnum því.“

Haukar verða með sópinn á lofti í næsta leik og ætla að klára einvígið.

„Við þurfum klárlega að mæta tilbúnari en í dag og bara leggja allt í þetta.“

Fannst þér þið mæta illa til leiks í dag?

„Já, svona svolítið. Við lentum eftir á í flestum aðgerðum og þær voru að ýta okkur út úr okkar hlutum. Þannig að við þurfum að skoða það aðeins og mæta tilbúnari í næsta leik“ sagði Þóra að lokum.

Emil Barja: Óánægður með margt og viss um að þær eru ekki búnar að gefast upp

„Ótrúlegt að hafa náð að klára þetta. Margt sem ég er ekki ánægður með. Við vissum alveg að þær myndu ekkert koma og gefa okkur þetta. Þær lömdu á okkur í byrjun og voru bara miklu harðari. Við svolítið koðnum. En jú, áttum mjög góðan fjórða leikhluta til að klára þetta“ sagði Emil Barja, þjálfari Hauka, strax eftir leik.

Hann var ósáttur með margt en ánægður með karakterinn í liðinu sem kláraði leikinn.

„Algjörlega. Hvernig allar stigu upp hérna. Það voru þrjár sem fóru út af meiddar í leiknum og við vorum í villuvandræðum. Ég var orðinn smá smeykur í fjórða, þegar það voru nokkrar meiddar og í villuvandræðum. Og við erum ekkert með allt of marga leikmenn núna. Ótrúlegur karakter að klára þetta, vel gert hjá þeim.“

Valur fann fleiri lausnir á hápressu Hauka en í fyrri leiknum. Haukarnir breyttu pressunni aðeins milli leikja en breyttu henni svo strax til baka í hálfleik.

„Við vorum mjög aggressívar í pressunni, aðlöguðum hana aðeins en breyttum strax til baka í hálfleik, þetta var ekki alveg að virka nógu vel. En þær gerðu líka bara vel, voru að leysa pressuna og gerðu þetta vel í fyrri hálfleik.“

Haukar verða með sópinn á lofti á laugardaginn og vilja klára einvígið í þremur leikjum.

„Ég þarf að fara aðeins yfir leikinn og sjá hvað við getum gert betur. Ég er hundrað prósent viss um að þær eru ekki búnar að gefast upp, munu mæta alveg brjálaðar í þennan leik og við verðum bara að taka á móti því. Vera með sama brjálæði á móti, megum ekki leyfa þeim að ýta okkur úr öllu“ sagði Emil að lokum.