„Við reyndum að gera alls konar“

„Mig langar kannski bara frekar að óska Álftanes til hamingju. Þeir spiluðu mjög vel og við áttum einhvern veginn ekki svör við því. Ég ætla ekkert að fara að rakka liðið mitt niður, þeir voru alveg að berjast,“ sagði Lárus eftir leik en blaðamanni fannst hans menn þó andlausari í leiknum en Lárus vildi meina. 

„Mér fannst Álftanes alltaf hafa svör við því sem við vorum að gera. Þeir eru bara búnir að spila betur en við upp á síðkastið og mér fannst þeir hafa stjórn á leiknum. Við náðum aldrei að snúa honum við en strákarnir voru alveg að reyna, þannig að ég ætla ekkert að setja út á það. Frekar hrósa Álftnesingum.“

Þórsarar byrjuðu leikinn illa og skoruðu aðeins ellefu stig í fyrsta leikhlutanum.

„Vörnin var alveg góð, ég held þeir hafi verið með átján stig þegar ein og hálf mínúta var eftir af fyrsta leikhluta. Sóknarleikurinn byrjaði á tveimur töpuðum boltum og við náðum ekki takti.“

Þórsarar spiluðu reyndar betri sóknarleik í öðrum leikhluta en fengu þá sömuleiðis á sig mörg stig. 

„Í öðrum leikhluta voru bæði lið sjóðandi heit en í síðari hálfleik voru þeir með stjórn á leiknum. Við reyndum að sprengja þetta upp, reyndum að gera alls konar. Mér fannst Álftanes spila rosalega vel og margir að leggja í púkkið. Það var ekkert eitt sem við þurftum að stoppa.“

Lykilmenn Þórsara Nikolas Tomsick og Mustapha Heron voru í brasi lengst af og mörg af þeim tuttugu og þremur stigum sem Heron skoraði komu þegar úrslitin voru ráðin.

„Tomsick er með brot í hnénu og er að reyna að gera sitt besta, hann er ekkert að æfa. Þeir eru að leggja allt í þetta og ég myndi frekar segja að Haukur [Helgi Pálsson] hafi gert vel á [Mustapha] Heron að taka taktinn úr hans leik. Auðvitað hefði ég óskað þess að þeir væru báðir með 30 stig en mér fannst aðrir stíga upp, Emil steig upp,“ sagði Lárus en Emil Karel Einarsson átti góðan leik fyrir gestina og skoraði 19 stig. 

„Álftanes var bara betra en við og við þurfum að sætta okkur við það. Það þýðir ekkert að dvelja of lengi við þetta.“