„Ég veit það ekki, þetta virkar eins og svolítið óðagot finnst manni að einhverju leyti, það er greinilega lögð upp sú flétta af hálfu borgarstjóra að slíta meirihlutanum og koma þá á þessum nýja fjögurra flokka meirihluta,“ segir Eiríkur.
Í gærkvöldi hófust viðræður milli oddvita Framsóknar, Sjálfstæðisflokks, Viðreisnar og Flokks fólksins um stjórnarmyndun. Inga Sæland sagði svo í dag að Flokkur fólksins muni ekki leiða Sjálfstæðisflokkinn til valda í borginni og var þeim viðræðum slitið að því er virðist.
Oddvitar Framsóknar og Sjálfstæðisflokks hafa ekki veitt viðtöl í dag.
Farið að minna á ástandið 2007 til 2008
Eiríkur segir að ástandið sé farið að líkjast ástandinu í borginni árin 2007 til 2008, þegar að hver meirihlutinn á fætur öðrum féll á hliðina, „og fólk plottaði gjörsamlega yfir sig í því að reyna koma saman nýjum meirihlutum.“
Atburðarásin seinasta sólarhringinn hafi verið ansi hröð hvað þetta varðar.
„Maður áttar sig ekki alveg nákvæmlega á því af hverju þetta þurfti að fara svona núna, það er í sjálfu sér ekkert í þessu flugvallarmáli sem er að koma til ákvarðanatöku akkurat í augnablikinu,“ segir Eiríkur.
Hann segir útlit fyrir að hvorki Framsókn né Sjálfstæðisflokkur verði í nýjum meirihluta, í ljósi ummæla Ingu Sæland.
Líklegasta sviðsmyndin sé nýr vinstri meirihluti.
„Þá myndi ég halda að þessi meirihluti sem nú er fallinn haldi áfram, og Vinstri grænir og Sósíalistar, sem hafa lýst yfir vilja í dag til að koma inn í meirihluta, þessir flokkar séu bara dæmdir til að taka við borginni.“
Eiríkur segir að Einar Þorsteinsson sé tiltölulega lítt reyndur stjórnmálamaður, hann hafi ekki neina sérstaka reynslu í stjórnmálum.
„Hann hefur verið í þessum stól núna í eitt ár, kemur fyrst inn í stjórnmál í seinustu sveitarstjórnarkosningum, hvort hann hafi plottað yfir sig, það er alveg mögulegt,“ segir Eiríkur.
„Þessi flétta sem hann lagði upp með, hún virðist hafa runnið út í sandinn, nema þessar fréttir sem við sáum áðan séu rangar, og það hefur nú margt komið fram í dag sem hefur reynst vera rangt.“
Engin furða að Inga vilji ekki starfa með Sjálfstæðismönnum
Eiríkur segir það ekki koma honum á óvart að Inga Sæland vilji ekki fara í samstarf með Sjálfstæðisflokknum.
„Því harkan í gagnrýni í garð Flokks fólksins hefur verið gríðarlega mikil að undanförnu. Hún hefur komið langmest frá Sjálfstæðisflokknum og tengdum öflum eins og Morgunblaðinu, og maður sér að þar á bæ, hjá Flokki fólksins, hefur fólk kveinkað sér undan þessari gagnrýni, þau eru sár.“
Hörð gagnrýni í stjórnmálum sé auðvitað fullkomlega eðlileg, en hún hafi þau áhrif persónulega á fólk að Inga Sæland hafi kannski ekki geð í sér að leiða Sjálfstæðisflokkinn til valda.
„Það er bara ákveðinn ómöguleiki í þessari fléttu sem borgarstjóri lagði upp með.“
Þá segist Eiríkur vona að atburðirnir í borgarstjórn fyrir tæpum tuttugu árum endurtaki sig ekki, því það hafi verið agalegt ástand fyrir borgarbúa.
