Styðja sér­lög um Hvammsvirkjun

Landsvirkjun tekur fram í tilkynningu vegna málsins að hafi verið ætlun löggjafans að lög skyldu standa í vegi fyrir nýjum vatnsaflsvirkjunum og stærri framkvæmdum, hefði það verið ein stærsta pólitíska ákvörðun þess tíma sem lögin um slíkt voru sett. Hvergi sjást merki þess að löggjafinn hafi ætlað umbylta málum með þeim hætti. 

Stjórnvöld beri þó mikla ábyrgð í málinu

Hörður Arnarson forstjóri Landsvirkjunar segir að óskað hafi verið eftir að áfrýja dómi héraðsdóms um Hvammsvirkjun frekar til Hæstaréttar en Landsréttar til að flýta fyrir niðurstöðu í málinu.

„Ef Hæstiréttur tekur málið fyrir næst endanlega niðurstaða. Ef það færi fyrir Landsrétt gæti það haldið áfram. Það er niðurstaða lögfræðinga okkar að það gæti gengið hraðar fyrir sig ef Hæstiréttur samþykkir að taka málið til umfjöllunar,“ segir Hörður.  

Hörður telur að stjórnvöld beri sína ábyrgð á töfum vegna Hvammsvirkjunar.

„Ég tel stjórnvöld bera þó mikla ábyrgð í málinu. Við sjáum það er búið að senda okkur tvisvar til baka með virkjunarleyfið út af göllum í málsmeðferð stjórnvalda sem er mjög óheppilegt. Við erum búin að vanda mjög til verka varðandi þessar framkvæmdir,“ segir Hörður. 

Vill sérlög um Hvammsvirkjun

Fram hefur komið að stjórnvöld íhugi að setja sérlög um Hvammsvirkjun og gera heildarendurskoðun á vatnalögum.

„Ég held að það sé mikilvægt að gera heildarendurskoðun á vatnalögum. Það eru ákveðnir ágallar sem eru að gera túlkunina flóknari. Síðan ættu stjórnvöld að skoða það að setja sérlög um Hvammsvirkjun,“ segir Hörður. 

Allar tafir feli í sér mikinn kostnað.

„Mesta tjónið er fyrir samfélagið því það er mikil þörf fyrir þessa orku. Þetta mun hafa áhrif á hagvöxt, fyrir orkuskipti og neikvæð áhrif fyrir margt í samfélaginu,“ segir Hörður. 

Fyrrum ráðherra hafnar gagnrýni

Fram hefur komið gagnrýni á að stjórnvöld hafi ekki brugðist við tveimur minnisblöðum Umhverfisstofnunar og minnisblaði sérfræðings þar sem bent var á mikilvægi þess að breyta 18. grein vatnalaga sem snúa að því   atriði sem varð til þess að héraðsdómur ógilti virkjunarleyfi Hvammsvirkjunar. 

Guðlaugur Þór Þórðarson fyrrverandi umhverfis- og orku- og loftslagsráðherra segir að ábendingarnar hafi ekki verið metnar veigamiklar í undirbúningnum og er undrandi yfir dómi héraðsdóms í málinu.

„Því var aldrei flaggað að það væri hægt að túlka vilja löggjafans á innleiðingarfrumvarpi 2011 að það væri ekki hægt að fara lengur í vatnsafls, brúargerð og jarðvarmavirkjanir á Íslandi,“ segir Guðlaugur.

Mikill undirbúningur hafi almennt farið fram varðandi virkjanarframkvæmdir.

„ Við höfum verið að vinna á fullu í þessu allt kjörtímabilið sem hefur farið í að einfalda ferla. Við höfum sameinað stofnanir og klárað rammaáætlun.  Á þingmálaskrá eru mál sem miða nákvæmlega að þessu. Ég skildi sérstaklega eftir hjá eftirmanni mínum þessa vinnu og hvatti hann til dáða. Það er til dæmis einföldunarfrumvarp nú þegar fyrir hendi í Samráðsgátt stjórnvalda og afhúðunarfrumvarp,“ segir hann. 

Guðlaugur ætlar að styðja aðgerðir núverandi ríkisstjórnar til að hraða fyrir Hvammsvirkjun.

„Við munum styðja ríkisstjórnina sama í hvaða formi hún mun gera það. Því það er búið að leggja gríðarmikla vinnu í að koma þessum virkjunum á koppinn,“ segir Guðlaugur.