Lögðu kapp á að senda Pútín við­vörun vegna eldsprengja

Sprengjur hafa einnig fundist í Póllandi.

Samkvæmt frétt New York Times fengu bandarískir embættismenn veður af því að Rússar hefðu sett sér það markmið að koma eldsprengjum gegnum skoðanir og í flugvélar til Bandaríkjanna.

Innan veggja Hvíta hússins voru Bandaríkjamenn með samtöl milli leiðtoga GRU um sprengjurnar og þessar tilraunasendingar. Þeir munu hafa talað um að útbúa þær þannig að eldar áttu að kvikna þegar pakkarnir voru komnir til Bandaríkjanna og Kanada.

Pakkar sem þessir eru yfirleitt fluttir með fragtflugvélum en geta verið fluttir um borð í hefðbundnum farþegaflugvélum með tilheyrandi hættu fyrir fólk.

Hringdu til Rússlands

Í viðtali við NYT staðfesti Alejandro Mayorkas, fráfarandi heimavarnaráðherra Bandaríkjanna, að markmið Rússa hafi verið að koma eldsprengjum til Bandaríkjanna og að reglur varðandi könnun pakka sem sendir eru þangað hafi verið hertar í kjölfarið.

Biden skipaði þjóðaröryggisráðgjafa sínum og yfirmanni CIA að senda aðstoðarmönnum Pútíns viðvörun. Að ef skemmdarverk af þessu tagi myndu valda mannfalli í háloftunum eða á jörðu niðri yrðu Rússar dregnir til ábyrgðar.

Ekki fylgdi viðvöruninni hvernig það yrði gert en skilaboðun munu hafa verið skýr. Skuggastríð Bandaríkjanna og Rússlands myndi ná nýjum hæðum.

Óljóst er hvort að viðvaranirnar náðu til Pútíns og ef svo er, hvað hann hafi ákveðið að gera. Eldsprengjur hafa þó ekki fundist frá því í sumar. Biden hefur ekki rætt við Pútín frá því í byrjun árs 2022. Donald Trump, sem tekur embætti 20. janúar, hefur lýst því yfir að hann ætli sér að ræða við Pútín og mögulega funda með honum mjög fljótlega.

Embættismenn segjast þó hafa áhyggjur af því að Rússar séu einfaldlega að þróa betri eldsprengjur sem erfiðara er að finna.

Blandaður hernaður í Evrópu

Undanfarna mánuði og jafnvel ár hafa rússneskir útsendarar verið sakaðir um fjölda skemmdarverka, íkveikja og morða, svo eitthvað sé nefnt, í Evrópu. Í einu tilfelli ætluðu rússneskir útsendarar sé að ráða forstjóra Rheinmetall, eins stærsta hergagnaframleiðanda Evrópu, af dögum.

Bruno Kahl, yfirmaður einnar af leyniþjónustum Þýskalands, varaði í fyrra við því að árásum og skemmdarverkum Rússa myndi fjölga á næstunni.

„Umfangsmikil notkun Rússa á blönduðum hernaði eykur líkurnar á því að NATO muni á endanum íhuga að virkja fimmtu greinina um sameiginlegar varnir.“

Kahl sagði einnig líklegt að Rússar myndu áfram reyna að kanna þær rauðu línur sem lagðar hafa verið og grafa undan samstöðu Vesturlanda og NATO.

Frá því Kahl gaf út þessa viðvörun hafa margir sæstrengir í Evrópu verið skemmdir. Talið er að það hafi verið gert af Rússum og hafa nokkrir strengir verið skemmdir á Eystrasalti.

Leiðtogar Atlantshafsbandalagsins tilkynntu á fundi aðildarríkja við Eystrasalt í Helsinki í Finnlandi í dag að auka ætti viðveru bandalagsins á svæðinu. Markmiðið væri að verja sæstrengi betur og verður notast við freigátur og eftirlitsflugvélar.

Mark Rutte, framkvæmdastjóri NATO, sagði þar að auki, samkvæmt AP fréttaveitunni, að notast yrði við smáan flota dróna til að bæta eftirlit og varnir á Eystrasalti.

Rutte sagði einnig að ríki NATO myndu ekki sætta sig við árásir á svo mikilvæga innviði og að þær myndu hafa afleiðingar, eins og það að leggja hald á skip sem notuð yrðu til skemmdarverka.