Fagna jólunum í Betlehem í skugga stríðs

Þau hjónin ræddu við blaðamann þar sem þau sátu á Jötutorginu svokallaða þar sem vanalega er allt þakið jólaskreytingum. Stærðar jólatré prýðir torgið yfir hátíðirnar ár hvert en í þetta sinn hafa innfæddir ákveðið að sleppa því. Sveinn var formaður Félagsins Ísland-Palestína um árabil og hefur hann og eiginkona hans, Björk Vilhelmsdóttir, heimsótt Palestínu oft. Þrátt fyrir hátíðleikann um jólin taki átökin á Gasasvæðinu mjög á þjóðina.

„Það leggst á alla þjóðina hér og maður finnur algjörlega fyrir því. Þetta er ekki eins og þetta hefur verið áður,“ segir hann.

Tómlegt en hátíðarlegt

Sveinn og Björk sóttu jólamessu í lúthersku kirkjunni sem er steinsnar frá Jötutorginu þar sem hin fræga Fæðingarkirkja stendur. Kirkjan sem reist var af Konstantínusi mikla á þeim stað sem sagt er að Jesús hafi legið í jötunni á fyrstu jólanóttinni.

Tómlegt er um að líta á þessum sögufræga og víðsótta stað. Pílagrímar og aðrir ferðamenn eru vanir að flykkjast til Betlehem yfir hátíðarnar sem knýr stóran gjafavöruiðnað og aðra sölumennsku.

„Það er alltaf örvænting þegar umferðin er lítil og það er afar áberandi. Hún er ekki nema örlítið brot af því sem fólk á að venjast. Það er nánast ekkert af ferðamönnum hérna,“ segir hann.

Þau hjón hafa lent í ýmsum vandræðum á sínum ferðalögum um Palestínu og Ísrael enda fer Sveinn Rúnar ekkert í grafgötur með afstöðu sína til stjórnvalda í Ísrael. Leyfi fengu þau þó til að komast til Palestínu og dvelja þar í átta daga. Sveinn lýsir því hvernig hjónin voru yfirheyrð aftur og aftur á meðan beðið var niðurstöðu frá ísraelsku leyniþjónustunni um hvort þau fengju inn eður ei.

Gestrisni og vinsemd 

Sveinn segir yndislegt að verja jólunum í Palestínu en að áhrif átakanna á Gasa og víðar setji sitt mark á hátíðarhöldin.

„Það er dálítið öðruvísi. Maður finnur ekkert fyrir þessum spenningi sem er heima hja börnunum. Þetta er ákaflega hátíðlegt að vera hérna í messu á aðfangadagskvöld og eins núna á jóladag. En þetta markast náttúrlega mjög af ástandinu á Gasa,“ segir hann.

Þrátt fyrir harm og missi segir Sveinn palestínsku þjóðina alltaf sama sér.

„Fólkið er alltaf það sama, elskulegt og þessi makalausa gestrisni og vinsemd sem maður mætir. Það er það sem er áberandi. Það er alveg sama á hverju gengur. Alveg sama við hvaða aðstæður fólk er,“ segir hann.

Hugurinn hjá fólkinu í Gasa

Björk Vilhelmsdóttir segir sorglegt að sjá hvað þjóðin sé skekin af átökunum.

„Það er mjög sorglegt að sjá hvað þjóðin er skekin af stríðinu á Gasa. Það litast allt mannlífið af því. En það er líka yndislegt að koma í Fæðingarkirkjuna og minnast fæðingar Jesús Krists,“ segir hún.

Allir kirkjugestir á aðfangadagsmessunni hafi tendrað kerti í kringum Jesúbarnið þar sem það liggur í jötunni reifað kúffíu, andspyrnu- og samstöðutákn Palestínumanna.

„Það er mjög dýrmætt að vera hér á jólunum. Núna er ekkert jólaskraut. Það hefur alltaf verið risajólatré á torginu en núna í ljósi ástandsins hafa Palestínumenn ákveðið að hafa engar skreytingar. Það er af því að hugurinn er hjá fólkinu í Gasa,“ segir Björk Vilhjálmsdóttir.