Vinnur við að slökkva elda og ætlar að slökkva í and­stæðingum sínum

Arn­grímur Anton, betur þekktur sem Toni er einn fjögurra pílu­kastara sem hefur tryggt sér sæti á úr­slita­kvöldi úr­vals­deildarinnar í Pílu­kasti á Bullseye í kvöld. Toni er með eitt mark­mið í huga fyrir kvöldið.

„Ég ætla að vera nú­mer eitt á landinu. Þá er ég kominn á réttan stað,“ segir Toni í sam­tali við Íþrótta­deild. „Ég er ótrú­lega spenntur. Þetta verður gríðar­lega spennandi kvöld. Ég ætla að vera í mínu besta formi.“

Óhætt er að sgja að mikil eftir­vænting ríki fyrir kvöldinu enda úr­slita­kvöld úr­vals­deildarinnar einn af há­punktum hvers tíma­bils í pílu­kastinu hér heima og hefur myndast gríðar­leg stemning meðal áhorf­enda á keppniskvöldum deildarinnar í vetur.

Keppt er eftir nýju keppnis­fyrir­komu­lagi í úr­vals­deildinni í ár. Deildar­fyrir­komu­lagi þar sem að fjórir efstu spilarar deildarinnar tryggðu sér þátt­tökurétt á úr­slita­kvöldi kvöldsins. Auk Tona eru það þeir Vit­or Charrua, Dily­an Kolev og Alexander Veigar Þor­valds­son.

„Það er búið að vera mjög spennandi að sjá svona nýjar breytingar á deildinni. Ekki halda í sama vanann aftur og aftur. Með þessu deildar fyrir­komu­lagi geta allir komist áfram og þetta hefur sýnt okkur að það eru ekki alltaf sömu mennirnir efstir.“

Á úr­slita­kvöldinu er keppt í hreinum útslætti þar sem að sá pílu­kastari sem nær fyrstur að vinna sex leggi tryggir sér sæti í úr­slita­ein­víginu þar sem vinna þarf sjö leggi til að tryggja sér úr­vals­deildar­titilinn.

Þarf að spila sinn besta leik

Til þess að komast í úr­slita­ein­vígið þarf Toni að leggja að velli reynslu­boltann Vit­or Charrua í undanúr­slitunum. Þeir hafa mæst áður og er Toni spenntur fyrir því að takast á við hann aftur.

Þetta er hægur spilari og það vita allir sem hafa spilað á móti honum að hann getur spilað hægar ef hann vill. Ég þarf bara að finna minn leik. Spila minn besta leik á móti honum og þá mögu­lega get ég haldið í við hann.“

Eftir góða byrjun og sigur á tveimur undank­völdum hefur hægst á Tona upp á síðkastið en hann lætur ekki deigann síga.

„Fyrstu tvær helgarnir var ég með sjálfsöryggið í botni. Ég ætlaði mér áfram og sannaði það tvær helgar í röð. Vann þau kvöld. Helgarnar sem fylgdu á eftir var ég dálítið niðri og ekki alveg í mínu besta dags­formi. Á úr­slita­kvöldinu ætla ég hins vegar að vera í mínu besta formi. Sýna hvað ég get.

Það verður stút­fullt hús á Bullseye og góð stemning, við getum treyst á það. Gott ef það fer ekki bara að verða upp­selt og fólk að verða of seint að verða sér út um miða. Ég hvet alla til að mæta og með stemninguna með sér. Mæta í búningum. Það eru búninga­verð­laun og allur pakkinn þarna.“

Fær stuðning frá vinnunni

Toni starfar sem slökkviliðs­maður hjá ISAVIA á Kefla­víkur­flug­velli og þar má finna mörg pílu­spjöld og auðvelt fyrir mann eins og Tona að halda leik sínum við og í vinnunni er sam­keppni.

„Það er fullt af geggjuð pílukösturum að vinna hjá ISAVIA. Einn og einn hérna sem ná að skáka manni. Láta mann finna fyrir því að maður þarf að æfa sig betur.“

Slysast á sigur?

„Já slysast á sigur,“ svarar Toni og hlær. „Það er mjög erfitt, þegar að maður labbar fram hjá pílu­spjaldi í vinnunni og sér pílurnar, að láta þær vera.

Og Toni er þakk­látur fyrir áhugann sem að vinnu­félagarnir sýna hans pílu­kast brölti.

„Það er ógeðs­lega þægi­leg til­finning sem fylgir því að vinna á vinnustað þar sem að gripið er vel utan um það sem að maður er að gera. Fjöl­skyldu­fyrir­tæki frá A-Ö.“

Á að vera á vakt

Og kannski besta dæmið um það er einn helsti bak­hjarl Tona, vinnu­félagi hans og vinur, Hilmar Þór Ævars­son sem hefur stutt ræki­lega við bakið á sínum manni.

„Maður gerir það sem að maður getur. Fyrst ég gat ekki orðið góður í pílu­kasti þá reynir maður að styðja við bakið á þeim sem að eru góðir,“ segir Hilmar. „Við Toni byrjuðum í þessu saman. Það er gaman að geta fylgt honum eftir í þessu á bak við tjöldin. Auðvitað styður maður sitt fólki. Ég ætla að gera allt sem í mínu valdi stendur til að mæta á úr­slita­kvöldið. Við eigum að vera á vakt. Það fer eftir veðri og vindum hvort maður nái að mæta. Hvort maður losni frá fyrr.“

Toni á að vera á vakt í kvöld en eins og hann hefur sjálfur snert á er skilningur vinnu­veitanda hans mikill þegar kemur að pílu­kastinu.

„Ég á að vera á vakt á morgun en ég á svo æðis­lega fjöl­skyldu hér í vinnunni að ég fæ að fara fyrr og gera mig kláran til að vinna kvöldið annað kvöld.“

Vinnan gerir allt sem í sínu valdi stendur til að sjá til þess að titillinn endi í þínum höndum?

„Að sjálfsögðu. Isavia er nú­mer eitt.“