Lækka það sem fæst hjá öðrum en hækka hitt

Í tilkynningu frá eftirlitinu segir að verslanir Iceland skeri sig úr í hækkun verðlags milli ára. Frá nóvember á síðasta ári hafi verðlag hækkað um tíu prósent, mun meira en í öðrum verslunum. Á sama tímabili hafi verðlag lækkað í Nettó, ólíkt öðrum verslunum. Sérstaklega er tekið fram að verðlag sé vegið eftir mikilvægi vöruflokka.

„Miklar sveiflur hafa verið í verðlagningu í verslunum Samkaupa, þ.e. Nettó, Kjörbúðinni, Krambúðinni og Iceland á þessu ári. Nettó og Kjörbúðin eru nú með lægri verðlagningu en fyrir ári síðan, á meðan Krambúðin og Iceland eru aftur með dýrari matvöruverslunum. Sé horft á risana á matvörumarkaði, Bónus og Krónuna, hefur verðlag hækkað milli ára, um 4% í Bónus og um 2,2% í Krónunni,“ segir í tilkynningu frá verðlagseftirlitinu.

Lækka verð á því sem samkeppnisaðilinn selur einnig

Lækkun á verðlagi í Nettó er sögð breiða yfir „áhugaverða þróun“. Verð á vörum í Nettó hafi hækkað um 0,4 prósent að meðaltali undanfarið ár, þegar ekki er vegið eftir mikilvægi vöruflokka. Sú hækkun dreifist þó ekki jafnt.

„Þær vörur sem Nettó selur sem einnig fást í Bónus hafa lækkað um 4% í verði milli ára að meðaltali, en vörur sem ekki má finna í Bónus hafa hækkað um 2% að meðaltali. Þetta kemur Nettó neðar í samanburði verðlagseftirlitsins.“

Sams konar mynstu hafi fundist í Krónunni nýverið, þar sem 1944-réttir sem einnig fáist í Bónus hafi reynst ódýrari en réttir sömu tegundar sem ekki fundust í Bónus. 

„Verðlagseftirlitið hvetur neytendur til að vera á verði gagnvart vörum sem ekki er hægt að bera beint saman milli verslana, þar getur leynst dulinn verðmunur. Nýverið benti Verðlagseftirlitið að erfitt væri að bera saman verð á Nóa Kroppi sökum þess að pakkningastærðir séu ólíkar milli verslana. Í þeirri könnun kom í ljós að kílóverð á Nóa Kroppi væri lægst í Costco.“

Vörur frá Nóa rjúka upp

Sé horft á verðþróun síðustu tólf mánaða mælist mikill munur á verðþróun eftir vöruflokkum og framleiðendum. Verðhækkanir hafi þannig verið verulegar á vörum tiltekinna framleiðenda. Vörur frá Nóa Síríus hafi hækkað um 24 prósent í Bónus og um 22 prósent í Krónunni milli ára. Vörur frá Xtra hafi hækkað um 19 prósent í Nettó og 22 prósent í Kjörbúðinni.

„Nói Síríus sker sig úr þegar breytingar á verði eftir framleiðendum í Krónunni og Bónus eru skoðaðar. Verð á vörum hinna stóru sælgætisframleiðendanna, Freyju og Góu-Lindu, hækka mun minna – um 10% og 7%.“

Í sundurliðuninni hér að neðan megi sjá hvers vegna verð í Krónunni hafi hækkað minna en í Bónus milli ára. 

„Euroshopper og Rema vörur hafa hækkað um tæplega 6% að meðaltali. Þær vörur eru seldar í Hagkaup og Bónus. Gestus vörur hafa hins vegar lækkað um tæplega 3%. Þær vörur eru seldar í Krónunni.“

Kartöflur hækka en eggin lækka

„Verð á kartöflum hækkaði mest í Bónus og Krónunni milli ára af þeim vöruflokkum sem til skoðunar voru. Súkkulaði hækkaði næstmest, en nokkrir flokkar lækkuðu í verði. Þar á meðal eru egg, sem lækka óverulega. Þetta er athyglivert í ljósi umræðu um eggjaskort á landinu,“ segir í niðurlagi tilkynningarinnar.