West Ham þarf ekki að yfir­gefa höfuð­borgina fyrr en í nóvember

Lundúnaliðin í ensku úrvalsdeildinni þurfa yfirleitt ekki að punga út jafn háum fjárhæðum og önnur lið í ferðakostnað, enda eru sjö af tuttugu liðum deildarinnar staðsett í höfuðborginni.

Arsenal, Brentford, Chelsea, Crystal Palace, Fulham, Tottenham og West Ham leika öll sína heimaleiki í Lundúnum og eins og oft áður verður nóg um borgarslagi milli þessarra liða.

Óhætt er að segja að leikmenn West Ham munu líklega ekki þjást af ferðaþreytu í upphafi tímabils. Liðið þarf ekki að fara út fyrir borgarmörkin til að leika deildarleik fyrr en í upphafi nóvember, þrátt fyrir að deildin hefjist þann 16. ágúst.

Er það vegna þess að leikjaniðurröðunin lendir þannig að þeirra fyrsti útileikur gegn liði sem er ekki staðsett í Lundúnum er gegn Nottingham Forest þann 2. nóvember.