Tuchel segist ekki hafa á­huga á því að taka við United

Tuchel, sem á þjálfaraferli sínum hefur meðal annars stýrt Bayern München og Chelsea, var talinn líklegur til að taka við United ef forráðamenn félagsins myndu ákveða að skipta út núverandi þjálfara, Erik ten Hag.

Samkvæmt heimildum BBC hefur Tuchel nú þegar átt fund með Sir Jim Ratcliffe, einum eiganda Manchester-liðsins.

Manchester United er ekki beint í þjálfaraleit, en Ten Hag hefur ekki enn fengið að vita hvort hann fái að stýra liðinu á næsta tímabili. Hollendingurinn hefur stýrt liðinu frá árinu 2022.

Undir hans stjórn hafnaði liðið í þriðja sæti deildarinnar á hans fyrsta tímabili, en endaði í áttunda sæti á nýliðnu tímabili. Liðið fagnaði þó sigri í enska deildarbikarnum tímabilið 2022-2023 og enska bikarnum í vor.