Eldinum í bílnum fylgdi heljarinnar sprenging

Þetta má sjá á myndskeiðum sem Flóki Larsen, sem átti leið hjá, lét Vísi í té. Þau má sjá klippt saman í spilaranum hér að neðan.

Í morgun var greint frá því að laust eftir klukkan 03 í nótt hafi verið tilkynnt um eld í bifreið í Vesturbæ Reykjavíkur. Slökkvilið hafi ekki verið lengi að slökkva eldinn en bíllinn, sem var sagður glænýr, væri ónýtur.

Sigurjón Hendriksson, varðstjóri hjá Slökkviliðinu á höfuðborgarsvæðinu, segir í samtali við Vísi að ekki sé vitað hvað olli brunanum að svo stöddu. Hann segist ekki búa yfir upplýsingum það hvers konar bíl um var að ræða, hvort hann væri knúinn rafmagni eða jarðefnaeldsneyti.

Þá segir hann að sprengingar, líkt og sú sem sést í myndskeiðinu hér að ofan, séu algengar í bílabrunum. Oftast séu það loftpúðar sem springa með nokkrum kraft og þeir séu víða í nútímabílum.

Þess vegna klæði slökkviliðsmenn sig ávallt í allan öryggisbúnað þegar bílabrunum er sinnt. Reynslan hafi sýnt að það borgi sig.