Hugsaði heim til konunnar og barnsins: „Vorum allir í sjokki“

„Eftir leik var fluginu okkar heim til Ísa­fjarðar af­lýst vegna slæmra veður­skil­yrða. Leik­menn áttu mögu­leika á því að vera á­fram í Reykja­vík yfir eina nótt en þar sem að ég á eigin­konu og barn á Ísa­firði þá vildi ég komast sem fyrst til þeirra,“ segir Sergine Modou Fall í samtali við Vísi.

„Veðrið á leiðinni var alls ekki gott. Færðin var á þann veg að við þurftum að fara lengri leiðina til Ísa­fjarðar og þegar að við komum til Hólma­víkur hafði veðrið versnað. Á einum tíma­punkti missir bíl­stjórinn stjórnina á bílnum í þessum erfiðu að­stæðum. Það var snjór og hálka á veginum, blint, og við enduðum utan vegar og bíllinn valt. Endaði á hvolfi.“

„Það er ekkert sem bíl­stjórinn hefði geta gert öðru­vísi. Að­stæðurnar voru bara hrika­lega erfiðar. Svo gerist þetta svo fljótt. Ég áttaði mig ekki einu sinni strax á því hvað væri að gerast þar sem að ég sat í aftur­sætinu að horfa á kvik­mynd í símanum mínum.“

Sem betur fer voru allir í bílnum, sem inni­hélt sjö leik­menn Vestra, í bíl­beltum.

„Við vorum skiljan­lega allir í sjokki eftir þetta. Ein­hverjir okkar fóru bara að hlægja í þessum að­stæðum. Eitt­hvað sem má rekja til sjokksins. Sem betur fer var þetta ekki vatn sem við endum í þarna utan vegar eða stór­grýtt svæði. Heldur bara snjór. Við bárum okkur allir vel þarna skömmu eftir bíl­veltuna. Létum ringul­reiðina ekki taka yfir. Panikkuðum ekki því það voru allir heilir. Enginn með opin sár.“

Biðin óþægilega

En við tók rúm­lega hálf­tíma bið eftir næsta bíl á síma­sam­bands­lausu svæði. Leik­mennirnir gátu ekki látið vita af sér. Gátu ekki látið vita af því sem gerst hafði.

„Sem betur fer var annar bíll á eftir okkur því við gátum ekki hringt á við­bragðs­aðila. Far­þegar þess bíls gátu látið vita af því sem gerst hafði. Þetta voru erfiðar að­stæður og bið sem að leið eins og heil ei­lífð. Þegar að bíllinn veltur og við erum í þessum að­stæðum, þá gat ég ekki annað en hugsað bara heim til eigin­konu minnar og barnsins míns. Ég gat ekki einu sinni látið þau vita af mér þarna.

Við­bragðs­aðilar mættu í kjöl­farið á staðinn og var tekin á­kvörðun um að flytja leik­mennina til Hólma­víkur til frekari skoðunar.

„Það komu allir vel út úr þeirri skoðun þrátt fyrir að and­lega hliðin hafi kannski fengið smá högg. Ég fann hins vegar fyrir sárs­auka í rif­beinunum. Læknirinn skoðaði það og óttaðist að mér gæti farið að blæða inn­vortis og vildi hann því senda mig suður til Reykja­víkur með sjúkra­bíl.“

Vegirnir á þeirri leið höfðu hins vegar lokast og farið var í það að opna þá svo sjúkra­bíllinn gæti flutt Fall suður á sjúkra­hús.

„Ég varði einni nótt á sjúkra­húsinu í Reykja­vík. Læknarnir vildu full­vissa sig um að það yrðu engin eftir­köst af þessu bíl­slysi fyrir mig. Ég var síðan út­skrifaður næsta dag.“

Og Fall færir okkur góðar fréttir. Honum líður vel, er byrjaður að æfa á nýjan leik með Vestra og er klár í að mæta Breiða­bliki í Bestu deildinni seinna í dag.

Ekki bara liðsfélagar, heldur bræður

Í frétta­flutningi af at­vikinu vakti at­hygli að Elmar Atli Garðars­son, Súð­víkingur og fyrir­liði Vestra, fylgdi Fall til Reykja­víkur á sjúkra­hús. Stað­reyndin er hins vegar sú að sam­band Fall og Elmars nær langt út fyrir það að vera bara liðs­fé­lagar. Þeir líta á sig sem bræður hvors annars.

„Það er mjög auð­velt fyrir mig að tala vel um Elmar. Þetta byrjaði allt saman árið 2015 þegar að ég kom fyrst vestur. Þá sem leik­maður á reynslu hjá BÍ/Bolungar­vík sem nú er Vestri. Elmar var á þeim tíma einn af yngstu leik­mönnum liðsins og tók mig eigin­lega strax undir sinn verndar­væng. Hann sá um mig. Ég kom þarna vestur og kunni varla stakt orð í ensku. Átti því í erfið­leikum með að vera í sam­skiptum við aðra þarna.

Þegar að um­ræddu tíma­bili lauk þarna 2015 þá hélt ég aftur heim en fékk svo annan samning hjá Vestra og sneri aftur til Ísa­fjarðar þarna um jólin 2015 og bjó á þeim tíma einn fyrir vestan. Elmar bauð mér að koma til sín og fjöl­skyldu sinnar og halda með þeim jól.

Það var ansi sér­stakt fyrir mig, að fá að upp­lifa jólin, þar sem að ég er mús­limi og held alla jafna ekki upp á jólin. Elmar bauð mér þarna að koma inn á heimili sitt og fjöl­skyldu sinnar, á mesta fjöl­skyldu­tíma ársins, og verja tíma með þeim. Það skipti mig ó­trú­lega miklu máli. Frá þessum tíma hefur sam­band okkar bara orðið sterkara og sterkara. Og for­eldrar Elmars kalla mig son sinn, þau hafa verið mér mikill stuðningur í gegnum allan þennan tíma “

En Elmar sýnir Fall ekki bara svona stuðning og hlýju.

„Elmar er þannig manneskja að hann er til í að hjálpa öllum sem eru hjálpar­þurfi. Ef ein­hver þarf á hjálp að halda þá væri Elmar maðurinn sem myndi mæta á staðinn og hjálpa þér. Allir hér vita hversu góðan mann og gott hjarta­lag Elmar hefur að geyma.“

Fall hefur reynt fyrir sér á fleiri stöðum á leik­manna­ferlinum en leiðin liggur ein­hvern veginn alltaf aftur vestur á Ísa­fjörð.

„Árið 2018 reyndi ég fyrir mér með liði ÍR. Svo hélt ég einnig út til Óman að spila fót­bolta á sínum tíma. En í hvert skipti sem ég fer eitt­hvað er ég látinn vita af því að dyrnar séu opnar fyrir mig hjá Vestra fyrir vestan. Ég lít á Ísa­fjörð og svæðið fyrir vestan sem mitt heimili. Í hvert sinn sem ég held eitt­hvað annað þá finn ég á endanum fyrir söknuði og vill ekkert nema að snúa aftur vestur. Sakna svæðisins og fólksins sem það hefur að geyma.“

Horfðu á mig og treystu mér

„Þegar að slysið átti sér stað. Var það Elmar sem hvatti mig til þess að fara til Reykja­víkur og frekari skoðun á sjúkra­húsi. Ég hélt því bara fram að það væri í lagi með mig, var í á­kveðnu sjokki og taldi mig bara í lagi. Áttaði mig ekki fylli­lega á að­stæðunum en sem betur fer var Elmar á­kveðinn og sagði við mig:

„Horfðu á mig. Ef það gerist eitt­hvað á leiðinni þá verð ég til staðar fyrir þig. Það er fullt af fólki annt um þig og það er fyrir bestu að þú látir kíkja á þig. Ekki hafa á­hyggjur. Ég verð hérna til staðar fyrir þig.“

Ég er svo þakk­látur fyrir að hafa kynnst honum í gegnum þetta fót­bolta­brölt mitt. Hann er á­byggi­lega stærsta á­stæðan fyrir því að ég er enn þá hérna á Ís­landi að spila. Þrátt fyrir að ég hafi reynt fyrir mér annars staðar þá höfum við alltaf haldið góðu sam­bandi. Sam­band sem nær út fyrir fót­boltann. Og það sama gildir um syst­kini hans og for­eldra. Þetta er mín fjöl­skylda fjarri heima­högum mínum í Senegal.“

Og er Fall spenntur fyrir fram­haldinu með liði Vestra í Bestu deildinni. Þrátt fyrir tap í fyrstu um­ferð gegn Fram eru leik­menn liðsins hvergi bangnir. Hafa fulla trú á góðu gengi í fram­haldinu. Eru ekki hræddir við neitt lið í deildinni.

Breiða­blik og Vestri eigast við í Bestu deildinni í Beinni út­sendingu á Subway deildar rás Stöð 2 Sport klukkan tvö í dag.