Ís­lenskur morðingi nú grunaður um brot gegn barni

Daníel Gunnarsson er 23 ára gamall. Faðir hans er íslenskur en móðir hans er af tékkneskum uppruna. Mæðginin fluttu til borgarinnar Ridgecrest í Kaliforníu þegar Daníel var ungur, en brotin sem hann hefur verið sakfelldur fyrir áttu sér stað vestan hafs líkt og þau brot sem hann er nú grunaður um.

Samkvæmt vef lögreglunnar í Kern-sýslu í Kaliforníu eru kæruliðirnir í nýja málinu fjórir talsins. Í fyrsta lagi er hann er grunaður um lostafulla háttsemi með barni undir fjórtán ára aldri, en í kærunni er talað um að slíkt hafi átt sér stað fjórum sinnum. Þá er honum gefið að sök að hafa stundað, líka fjórum sinnum, munnmök eða samneyti með barni undir tíu ára aldri. Einnig er hann kærður fyrir vörslu barnaníðsefnis.

Ekkert er gefið upp um sakarefni fjórða kæruliðarins nema að það brot hafi átt sér stað einu sinni.

Margra ára tímabil

Saksóknari hefur gefið út að meint brot Daníels hafi beinst að ungri stúlku og þau átt sér stað á nokkurra ára tímabili með hléum, frá árinu 2016 til 2021.

Staðarmiðillinn KGET greinir frá því að brotaþoli málsins hafi gefið skýrslu og vilji meina að Daníel hafi neytt hana til kynferðisathafna í þónokkur skipti á umræddu tímabili.

Forréttarhöld í þessu nýja máli Daníels muni fara fram í byrjun aprílmánaðar. Þar mun dómari meta hvort næg sönnunargögn séu til staðar til að ákæra í málinu, sem þýðir að málið muni fá formlega meðferð fyrir dómstólum.

Þá hefur miðillinn eftir verjanda Daníels að honum standi ekki til boða að gera dómsátt.

Dæmdur fyrir hrottalegt morð

Í september í fyrra var Daníel sakfelldur fyrir að myrða hina 21 árs gömlu Katie Pham í maí 2021. Nokkrum vikum síðar ákvarðaði dómari refsingu Daníels, sem hlaut dóm sem fer frá því að varða 25 ára fangelsisvist upp í lífstíðarfangelsi.

Pham og Daníel höfðu átt í skammlífu ástarsambandi, en þau voru einnig bekkjarsystkini.

Manndrápið var framið með ísexi. Daníel var sagður hafa snert lík hennar á kynferðislegan hátt en hann var einnig sakfelldur fyrir að limlesta líkið.