Ís­lendingurinn var hand­tekinn í Baltimore

Hjördís Sigurbjörnsdóttir, aðstoðaryfirlögregluþjónn á höfuðborgarsvæðinu, segir í samtali við fréttastofu að farið hafi verið í eina húsleit og það á heimili mannsins. Þórir Ingvarsson, aðstoðaryfirlögregluþjónn á höfuðborgarsvæðinu sem hefur yfirumsjón með skotvopnaleyfum hér á landi, segir að lagt hafi verið hald á öll vopn sem fundust á heimilinu.

Þannig sé verklagið í slíkum málum. Almennt segir Þórir að þegar svona mál séu til rannsóknar sé fólk svipt tímabundið leyfi áður og vopn fjarlægð af heimili fólks. Í framhaldinu sé tekin ákvörðun til lengri tíma. Fram kom í tilkynningu frá lögreglunni á höfuðborgarsvæðinu að lagt hafi verið hald á mörg skotvopn, bæði skammbyssur og vélbyssur, og íhluti ásamt mikið magn skotfæra.

Vel staðið að geymslu

Megnið af þeim vopnum sem fundust við leitina eru í eigu húsráðanda enda skráð á hann í skotvopnaskrá. Þó er ljóst að hluti vopnanna er það ekki og viðkomandi vopn ekki skráð hérlendis eða í eigu annarra.

„Auk þessa var haldlagt nokkuð af skotgeymum sem ekki eru löglegir til innflutnings hérlendis, hljóðdeyfar og fleira smálegt. Húsráðandinn sem um ræðir er með skotvopnaleyfi og er með leyfi fyrir öllum þeim flokkum skotvopna sem í boði eru hérlendis, þ.m.t. safnvopnum,“ sagði í tilkynningunni.

Samkvæmt heimildum fréttastofu er karlmaðurinn á sextugsaldri og var handtekinn á flugvellinum í Baltimore. Þórir segir að vel hafi verið staðið að geymslu vopnanna á heimili karlmannsins.

Ólöglegur útflutningur litinn alvarlegum augum

Fram kom í tilkynningu lögreglu að í flugfarangri karlmannsins hefðu fundist skotvopn, íhlutir skotvopna og skotfæri.

„Ólöglegur útflutningur skotvopna og tengdra hluta er litinn mjög alvarlegum augum vestanhafs og hefur maðurinn því setið í varðhaldi allt frá handtöku.“

Þórir segir þann anga málsins alfarið til rannsóknar vestan hafs. Almennt sé það þó þannig að til að flytja inn vopn til Íslands þurfi að sækja um innflutningsleyfi. Það hafi ekki verið gert í þessu tilfelli. Þá þurfi eftir því sem hann kemst næst einnig að sækja um útflutningsleyfi í Bandaríkjunum.

„Vopnasmygl er víða um heim lagt að jöfnu við skipulagða brota- eða hryðjuverkastarfsemi og viðurlög við slíku því jafnan mjög ströng,“ sagði í tilkynningu lögreglu.

Strangar kröfur um geymslu

Þórir segir aðspurður miklu fleiri með mikinn fjölda vopna á heimili sínu en almenning grunar. Stífar reglur séu þó um skráningu, tiltekin skotvopn séu leyfileg og fari leyfi til innflutnings eftir því hvaða leyfi viðkomandi hafi.

„Það eru alltaf nokkur hundruð einstaklinga með sem eiga tugi vopna. En þegar fólk er með safnararéttindi eru gerðar miklu meiri kröfur um geymslu á vopnunum,“ segir Þórir.

Nýsamþykkt vopnalög krefjist þess meðal annars að við fyrsta vopn þurfi eigendur vopna að notast við viðurkenndan skotvopnaskáp. Það hafi áður verið við fjórða vopn. Til að hafa safnaraleyfi þarf umsækjandi að ráða yfir byssuskáp og að auki þarf að vera öryggiskerfi í því húsnæði sem byssuskápurinn er staðsettur í. Þá þarf úttekt og samþykki lögreglustjóra sem og slökkviliðsstjóra. Sé þetta ekki til staðar fær viðkomandi ekki safnaraleyfi.

Lögreglan á höfuðborgarsvæðinu rannsakar nú þann anga málsins sem snýr að vopnum og íhlutum sem fundust hér á landi sem ekki var leyfi fyrir.

Tilkynningu lögreglu má sjá í heild að neðan.

Fréttastofa tekur við ábendingum um þetta mál sem önnur á netfangið ritstjorn@visir.is.

Fréttin hefur verið uppfærð.