„Það var engu bætt inn í samninginn sem sneri að tölu­legum þáttum“

Deilan snerist um vinnu við svokallað virðismat en í vikunni lögðu stjórnvöld fram tillögu sem var utan þess ramma sem kjarasamningar gerðu ráð fyrir. 

Vildu kennarar ekki samþykkja þá tillögu en Ástráður Haraldsson ríkissáttasemjari lagði fram sáttatillögu í gær sem samkvæmt heimildum fréttastofu heldur inni fyrirvörum sem kennarar telja mikilvæga og ekki voru hluti af þeirri tillögu sem stjórnvöld lögðu fram í vikunni.

„Það eru engar tölulegar breytingar heldur fyrst og fremst voru þarna ákvæði sem kölluðu á frestun og vikan snerist um að koma því í farveg sem að þýddi það að samningurinn bara gæti haldið áfram óbreyttur. Það var engu bætt inn í samninginn sem að sneri að tölulegum þáttum eða slíku,“ sagði Magnús í viðtali í hádegisfréttum Bylgjunnar.

Er þá búið að framlengja frest til þess að klára vinnu um virðismat?

„Já, það er akkúrat það sem við gerðum í gær og það sem ríkissáttasemjari kom með tillögu um og var að lokum samþykkt, hvernig það var gert.“

Í frétt á vef RÚV er haft eftir Ástráði Haraldssyni ríkissáttasemjara að endurskoðunarpunktur, þar sem kjarasamningur sé rýndur og kannað hvort forsendur hafi staðist, hafi verið færður til 15. mars og þá verði staðan tekin á ný.

Ástráður segir þar að þá verði komin skýrari mynd af vinnu við virðismat og að þá verði auðveldara fyrir samninganefndir að ákveða hvort þær vilji halda áfram eða segja kjarasamningum upp.

Vikan hafi skilað ávinningi fyrir alla

Hann segir gríðarlega mikilvægt að samkomulag hafi náðst, vikan hafi verið strembin en dagurinn í gær hafi verið góður.

Daði Már Kristófersson fjármálaráðherra tjáði sig um stöðu mála á föstudag og segist Magnús nú vongóður um að allir sem að málinu komi gangi í takt. 

„Við skulum orða það þannig að við höfum væntingar um það að verkefnið sé núna skýrara í öllum hornum og að vikan hafi að lokum skilað því að allir hafi fengið einhvers konar vinning, báðar samninganefndir.“