Utan vallar: Bestu er­lendu framherjarnir í sögu ís­lenska fót­boltans

Steven Lennon lagði skóna á hilluna í vikunni og það er enginn vafi á því að þar fer einn besti erlendi leikmaður sem hefur spilað í íslensku deildinni.

Lennon var sá fyrsti og enn sá eini úr hópi erlendra leikmanna sem hafa skorað hundrað mörk í íslensku deildinni. Hann hefur einnig skorað 25 mörk í bikarnum og er því með 126 mörk í deild og bikar. Lennon er í hópi markahæstu manna á báðum vígstöðvum.

Markalistinn hans er langur og glæsilegur og hann hefur líka verið að búa til mörk fyrir félaga sína. Hann varð tvisvar Íslandsmeistari með FH og þó að síðustu ár hafi verið frekar litlaus hjá honum þá átti hann mörg frábær tímabil hér á landi.

Hver er sá besti?

En hver er besti erlendi framherjinn sem hefur spilað í efstu deild karla í knattspyrnu?

Ég ákvað að skoða aðeins afrekaskrá nokkurra leikmanna sem mér fannst koma til greina ef ætlunin væri að velja þann besta. Þetta er auðvitað aðeins mitt persónulega mat og ég er ekki í vafa um það að það er fólk þarna úti með allt aðra skoðun en ég.

Ég tók auðvitað inn í myndina markaskor leikmanna og hversu mörg mörk þeir voru að skora að meðaltali í leik. Ég skoðaði líka stoðsendingarnar enda þarf góður sóknarmaður einnig að leggja upp mörk fyrir félaga sína. Þá athugaði ég líka hvort leikmennirnir höfðu orðið Íslandsmeistarar, orðið markakóngar eða verið kosnir bestu leikmenn tímabilsins.

Farið fyrir liði í þremur titlum

Sá sem stendur upp úr að mínu mati er Patrick Pedersen sem hefur farið fyrir sóknarleik Valiðsins í þremur Íslandsmeistaratitlum. Hann er líka aðeins tveimur mörkum og einni stoðsendingu á eftir Steven Lennon yfir þá erlendu framherja sem hafa skorað og lagt upp flest mörk í deildinni. Það er líklegt að hann komist í efsta sætið í sumar og ógni jafnvel sjálfu markametinu ef hann heldur áfram að raða inn mörkum.

Pedersen er með samning við Valsmenn næstu tvö tímabil eftir að hafa skrifað undir nýjan samning í október. Valsmenn eru með öflugt lið og hann er líklegur til að bæta við bæði mörkum og titlum á næstu árum.

Sumum finnst það eflaust of lágt að setja Steven Lennon alla leið niður í fjórða sætið en ég hef ekki séð betri leikmann spila hér í deildinni en Allan Borgvardt sumarið 2005. Hann missir þó af efsta sætinu af því að hann spilaði hér aðeins í þrjú tímabil.

Frammistaða Borgvardt sumarið 2005

Tímabilið 2005 var Borgvardt allt í öllu í sóknarleik FH-liðsins sem vann alla fimmtán leiki sína og var orðið Íslandsmeistari þegar liðið tapaði fyrstu stigum sínum. Borgvardt hafði einnig verið valinn besti leikmaðurinn 2003 þegar hann ásamt landa sínum Tommy Nielsen breytti FH-liðinu úr fallbaráttufóðri í næstbesta lið sumarsins.

Mihajlo Biberčić er einnig ofar en Lennon en þessi Serbi var magnaður með ÍA og KR á tíunda áratugnum. Þegar hann var í formi réðu fáir varnarmenn við hann. Vandamálið var að hann safnaði kílóum á veturna eins og hann safnaði mörkum á sumrin. Hann var engu að síður fyrsti erlendi leikmaðurinn til að verða markakóngur deildarinnar þegar hann skoraði fjórtán mörk fyrir ÍA sumarið 1994 eftir að hafa skorað þrettán mörk sumarið á undan. 27 mörk á tveimur árum fyrir tvö Íslandsmeistaralið.

Lykilmenn í tveimur af bestu liðum sögunnar

Það vegur líka mjög þungt að þessir tveir framherjar voru lykilmenn í tveimur af bestu liðum allra tíma. Biberčić kom að tuttugu mörkum í Skagaliðinu sumarið 1993 og Borgvardt átti þátt í 21 marki FH-inga sumarið 2005.

Lennon fær því fjórða sætið á listanum og er á undan þeim Gary Martin og Nicolaj Hansen. Hansen byrjaði rólega og leit ekki allt of sannfærandi út en hefur átt mögnuð undanfarin ár sem einn af leiðtogum sigursæls Víkingsliðs. Hér fyrir neðan má sjá tölfræði þessara kappa.