KR-ingar skemmdu veislu­höld Víkinga og KA skoraði fjögur

Víkingar hófu leik gærkvöldsins af miklum krafti og voru 2-0 yfir í hálfleik þökk sé mörkum frá Aroni Elís Þrándarsyni og Danijel Dejan Djuric. Víkingar fengu færi til að klára leikinn en þeim tókst það ekki og í síðari hálfleik bitu gestirnir frá sér. Benóný Breki Andrésson minnkaði muninn og Kristinn Jónsson jafnaði metin á 73. mínútu, lokatölur 2-2. 

KA tók á móti Keflavík fyrir norðan í því sem reyndist stórskemmtilegur leikur. Jakob Snær Árnason kom KA yfir eftir aðeins þrjár mínútur og örskömmu síðar var staðan orðin 2-0, Hallgrímur Mar Steingrímsson með markið. Ísak Daði Ívarsson minnkaði muninn fyrir gestina en Ásgeir Sigurgeirsson skoraði um miðbik fyrri hálfleiks og staðan 3-1 í hálfleik.

Ígnacio Heras Anglada minnkaði muninn í 3-2 áður en Hallgrímur Mar gulltryggði sigur heimamanna, lokatölur 4-2.