Fanga­geymslur fullar eftir nótt skemmtana á Akur­eyri

Fjölmennt er á Akureyri þar sem hátíðin Bíladagar eru haldnir um helgina. Til viðbótar útskrifuðust nemendur úr Menntaskólanum á Akureyri og eldri stúdentar „júbíleruðu“ í blíðskaparviðri í gær. 

Árni Páll Jóhannsson, aðalvarðstjóri hjá lögreglunni á Akureyri, segir ómögulegt að slá á fjöldann sem var í bænum.

„Það var mjög margt um helgina. Það voru margir að skemmta sér. Miðað við fjölda sem er í bænum þá er svo sem ekkert stórt sem kom upp í nótt,“ segir hann.

Eitthvað var um minniháttar pústra og þá voru nokkrir ökumenn teknir fyrir ölvunar- eða fíkniefnaakstur.

Enn á eftir að yfirheyra karlmann sem var handtekinn vopnaður öxi á tjaldsvæði í gær. Ekki hefur verið tekin ákvörðun um hvort að farið verði fram á gæsluvarðhald yfir honum.