Nám­skeiðið hafi ein­kennst af sam­hengis­lausu tali

Í fyrrasumar keypti konan aðgang að dagsnámskeiði hjá ónefndu fyrirtæki fyrir sig og fjölskyldu sína. Greiddi hún fyrir það 240 dollara, tæplega 34 þúsund krónur, og fékk einnig kennslubók. 

Vill hún meina að fyrirtækið sem hún keypti námskeiðið af hafi ekki veitt þá þjónustu sem hún taldi sig vera að kaupa. Krafðist hún fullrar endurgreiðslu þar sem fyrirkomulag og inntak námskeiðsins hafi verið með öllu óásættanlegt í engu samræmi við þær upplýsingar sem komi fram á heimasíðu fyrirtækisins. 

Samhengislausir fyrirlestrar

Meðal þess sem hún kvartaði undan í kæru sinni til Kærunefndar vöru- og þjónustukaupa var að námskeiðið hafi ekki farið fram í kennslustofu eins og áætlað var heldur heima hjá starfsmanninum sem hélt fyrirlestra námskeiðsins. 

Þá hafi fyrirlestrarnir sjálfir einkennst af fjögurra klukkustunda samhengislausu tali um eitthvað sem er strikað úr dómnum og önnur málefni. Hafi fyrirlesarinn ítrekað farið út fyrir efnið og á einum tímapunkti boðið dóttur konunnar að sitja í fangi sér þar sem hún hafi verið við það að sofna undir fyrirlestrinum. 

Konan kveðst hafa verið í töluverðu áfalli eftir námskeiðið þar sem það hafi ekki verið í samræmi við væntingar sínar. 

Hún hafði kynnt sér upplýsingar námskeiðsins og umsagnir viðskiptavina á heimasíðu fyrirtækisins en þær voru allar afar jákvæðar. Sagan var þó allt önnur ef skoðaðar voru ferðasíður á borð við TripAdvisor þar sem er að finna fjölda umsagna frá einstaklingum sem hafi fengið slæma reynslu af námskeiðinu. 

Engin andsvör bárust

Nefndinni bárust engar umsagnir eða andsvör um kæruna frá fyrirtækinu eftir að hafa óskað eftir þeim.

Að mati nefndarinnar hefði konan átt að reyna að leysa málið beint með gagnaðila, sem hún hafði ekki gert. Hún hafði ekki verið í neinum samskiptum við fyrirtækið og einungis óskað eftir því að fá endurgreiðslu hins greidda gjalds við kortafyrirtæki sitt en sú greiðsla barst henni nýlega. 

Þar sem hún hafði ekki reynt að hafa samband fyrst við seljanda og greint honum frá kvörtun sinni var kærunni því vísað frá nefndinni. Þá var einnig litið til þess að konan hafði þegar fengið endurgreitt frá kortafyrirtæki sínu. 

Úrskurð nefndarinnar má lesa í heild sinni hér.